Atyraý qalasynyń ákimshilik quqyq buzýshylyqtar jónindegi mamandandyrylǵan sotynda usaq buzaqylyq jasaǵany úshin 28 adamǵa qatysty 28 is qaraldy. Quqyq buzýshylarǵa aiyppul salyndy, dep habarlaidy QazAqparat.
Ákimshilik quqyq buzýshylyqtar jónindegi mamandandyrylǵan sotynyń baspasóz qyzmetinen málim etkendei, 28 adamnyń isi QR Ákimshilik quqyq buzýshylyq týraly kodeksiniń 434-babynyń 1-bóligimen qaralǵan.
Quqyq buzýshylar qoǵamdyq orynda, atap aitqanda, «Atyraý» men «Aqtóbe» fýtbol komandalary arasyndaǵy kezekti match ótetin stadion aldynda tóbelesken. Olardyń bul áreketeti ainalasyndaǵylardy syilamaý, qoǵamdyq tártipti jáne jeke tulǵalardyń tynyshtyǵyn buzý retinde saralanǵan.
Sot ákimshilik jaza qoldaný barysynda quqyq buzýshylardyń jaýaptylyǵyn aýyrlatatyn mán-jailardyń joqtyǵyn eskerdi. Sondai-aq, sottalýshylardyń kinásin moiyndaǵanyn, otbasylyq jaǵdaiyn, ákimshilik quqyq buzýshylyqty birinshi ret jasaǵanyn jaýaptylyǵyn jeńildetetin mán-jailar retinde tanydy.
Sot qaýlysymen 2 adamnyń árqaisysyna 15 315 teńge, al, 26 tulǵanyń árqaisysyna 10 721 teńge kóleminde ákimshilik aiyppul salyndy.
Sot qaýlylary zańdy kúshine engen joq.
Eske sala ketelik, buǵan deiin Atyraý stadionynda fýtbol jankúierleri tóbelesip qalǵanyn bolatyn.
Jankúierler arasyndaǵy tóbeles 19 maýsymda saǵat 17:55 shamasynda Atyraý qalasyndaǵy «Munaishy» stadionynyń aldynda bolǵan.
«Politsiia qyzmetkerleri qoǵamdyq orynda quqyq buzýshylyqqa jol bergen 30 adamdy ustady. Olar Atyraý qalalyq politsiia basqarmasyna jetkizildi. Tóbeleske kezinde jankúierlerdiń qolynda túrli-tústi tútin shyǵaratyn dybysy bar zat bolǵan», - dep málim etti baspasóz qyzmetinen.
