Atyraý oblysy PD Uiymdasqan qylmysqa qarsy kúres basqarmasynyń qyzmetkerleri satýǵa daiyndalǵan 300 kelige jýyq bekire balyǵyn tárkiledi, – dep habarlaidy "Ult aqparat" Polisia.kz portalyna silteme jasap.
"Atyraý qalasynda PD Uiymdasqan qylmysqa qarsy kúres basqarmasy men shuǵyl qimyldaityn arnaiy jasaǵynyń qyzmetkerleri jedel-izdestirý is-sharalaryn júrgizý kezinde zańsyz aýlanǵan bekire tuqymdas balyqtaryn qala ishinde satpaq bolǵan ákesi men ulyn, iaǵni 61 jastaǵy jáne 37 jastaǵy eki jergilikti turǵyndy ustady.
Belgili bolǵandai, Niva avtokóligin toqtatyp, tintý kezinde kúdiktilerdiń úiiniń janynda, sondai-aq mekenjaiynan 280 keliden astam bekire balyǵy tabylyp, tárkilendi" - delingen habarlamada.
Qazirgi tańda QR QK-niń 339-baby (Ósimdikterdiń nemese janýarlardyń sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan túrlerimen, olardyń bólikterimen nemese derivattarymen zańsyz ainalysý) boiynsha sotqa deiingi tergep-tekserý júrgizilip jatyr.
Memleketke keltirilgen zalal quny 130 mln teńgeni qurady. Ustalǵandar ýaqytsha ustaý izoliatoryna qamaýǵa alyndy.
