Atyraý oblysynyń 2 myń avtomobil jolynyń jartysy nashar jaǵdaida. Bul týraly Memleket basshysy Nursultan Nazarbaev Atyraý oblysynyń áleýmettik-ekonomikalyq damý məseleleri jóninde keńeste aitty, dep habarlaidy QazAqparat tilshisi.
«Oblysta 2 myń avtomobil jolynyń jartysy nashar jaǵdaida, ishki joldy aitamyn. Oǵan biz endi kirisemiz. Investitsiialar jáne damý ministrligimen birlesip, qazirgi istep jatqan sharýamyz Atyraýdan Aqtóbege deiin joldy, Atyraýdan Astrahanǵa deiin joldy biyl-endigi jyly salyp bitiremiz. Qazir Atyraý Oralǵa shyǵady, tómen qarai Mańǵystaýǵa shyǵady, Mańǵystaýdan Túrikmenstanǵa ótip, Parsy shyǵanaǵyna deiin jol ashylady», - dedi Nursultan Nazarbaev.
Memleket basshysy Qazaqstannyń qurlyqtyq memleket ekenin eske saldy.
«Bizdiń teńizge shyǵatyn jaǵalaýymyz joq. Bizdiń júk tasymaldaýymyz qiyn, tasymaldaý baǵasy joǵary. Sondan kóp qarajat joǵaltamyz. Sondyqtan meniń istegen sharýam, birinshiden Qytaimen kelisip, anaý Tynyq muhittaǵy Lianiýngan portynan terminal saldyq. Qytaidyń shekarasynan Reseige deiin úsh myń shaqyrym eń joǵary dárejeli avtokólik joly salyndy. Týra Qazaqstannyń ortasymen Jezqazǵannan Kaspii teńizine deiin 2,5 myń shaqyrym temir jol salyndy»,- dedi Elbasy.
Nursultan Nazarbaev Túrikmenstan arqyly Bandarabas portyna shyǵyp búkil arab memleketterimen, Úndistanmen saýda-sattyq jasaý múmkinshiligi ashylǵanyn atap ótti. Al Quryq porty arqyly tikelei Kavkazǵa, odan ary Qara teńizge, Aq teńizge shyǵý múmkindigimiz bar ekendigin aitty.
«Qazir quryq portynan Qazaqstan arqyly Eýropaǵa, Reseige tasymaldanatyn konteinerlerdiń kólemi jylyna 2 esege artyp otyr. Sondyqtan infraqurylym, jol degenimiz ósip-óný degen sóz», - dedi Memleket basshysy.
