Atyraý oblysyndaǵy Saǵyz aýylynyń mańynda bolǵan atystan keiin turǵyndar tergeýdiń ádil júrgizilýin, kinálilerdiń jazalanýyn talap etti, dep habarlaidy QazAqparat.
Budan buryn Atyraý oblysynda aýyl jastary arasynda atys bolyp, 6 adam jaraqat alǵanyn jazǵan edik.
Oblystyq politsiia departamenti baspasóz qyzmetiniń aqparatyna súiensek, 30 qazanda saǵat 19:30-da «Atyraý-Aqtóbe» tas jolynyń 331-shaqyrymyndaǵy Saǵyz aýylynyń mańynda jastar bir-birine oq atqan. Oqiǵa ornynda 6 adam jaraqat alyp, Saǵyz aýyldyq dárigerlik ambýlatoriiasyna jetkizilgen.
Keiin atystan 5 adam oq jaraqatyn, 1 adam dene jaraqatyn alǵany anyqtaldy. Jaraqat alǵandardyń biri – 1985 jyly týǵan azamat aýrýhanada qaitys bolǵan.
Atyraý oblystyq densaýlyq saqtaý basqarmasynyń baspasóz qyzmeti oq tiip, jaraqat alǵandardyń jaǵdaiy týraly aqparat taratty. Jaraqat alǵandardyń bireýi úiine jiberilgen. Bir er adam Maqat aýdandyq aýrýhanasyna jetkizilgen. Úsh adam túrli jaraqatpen oblystyq aýrýhanaǵa jatqyzylǵan.
Qyzylqoǵa aýdanyndaǵy atystan keiin politsiia qyzmetkerleri Saǵyz aýylynda kúsheitilgen rejimde jumys isteýge jumyldyryldy.
Oblystyq politsiia departamentiniń bastyǵy, politsiia polkovnigi Qamza Úmbetqalievtyń aitýynsha, tártip saqshylary Saǵyz aýylyn táýlik boiy patrýldep, kúsheitilgen rejimde jumysyn jalǵastyryp jatyr. Oqiǵa ornynda Atyraý oblystyq politsiia departamentiniń jedel-tergeý toby jumys isteýde. Atalǵan derekke qatysty QR Qylmystyq kodeksiniń 99-babynyń 2-bóligimen (Adam óltirý) tergeý bastaldy.
Bir kúnnen soń oblystyq aýrýhanaǵa túsken úsh adamnyń jaǵdaiy ortasha aýyr jáne aýyr dep baǵalanǵanyn habarlaǵan bolatynbyz.
Oblystyq aýrýhanaǵa 1985 jyly týǵan úsh er adam túsken. Eki naýqas neirohirýrgiia bólimshesinde, úshinshi naýqas hirýrgiia bóliminde em-dom qabyldap jatyr.
Al, keshe, 2 qarashada Saǵyz aýylyndaǵy politsiia bólimshesine 25 áiel adam kelip, 30 qazan oryn alǵan oqiǵaǵa qatysty ádil tergeý júrgizilip, kinálilerdiń jazalanýyn suraǵan.
«Qazir oblystyq politsiia departamentinen kelgen arnaiy jedel top tergeý júrgizip jatyr. Tergeý isi ádil ótedi. Atyraý oblystyq politsiia departamenti basshysy Qamza Úmbetqaliev tergeý isin tikelei baqylaýynda ustap otyr. Atyraý oblysynyń ákimi Mahambet Dosmuhambetov bir adam qaitys bolǵan qandy oqiǵany baqylaýyna aldy. Sotqa deiingi tergep-tekserý derekteri jariia etýge jatpaidy» - dep málim etti Qyzylqoǵa aýdany ákimi Nursultan Bisembiev.
