Is materialdaryna sáikes, 2019 jyldyń jeltoqsanynda 11 ailyq bala qaitys boldy. Ol iPad qaqpaǵyndaǵy magnitti jutyp qoiǵan. Bul rette, sábidiń ata-anasy kómek surap, dárigerlerge júgingen. Biraq olar balaǵa ota jasamai, sábi jutyp qoiǵan zat tabiǵi jolmen shyǵady dep sendirgen.
Sot baspasóz qyzmeti málimetinshe, 2019 jylǵy 22, 23, 26 jeltoqsanda kezekshilik etken Atyraý oblystyq balalar aýrýhanasynyń hirýrg-dárigerleri Tileýǵaliev, Zulqashev, Adrisov, pediatr-dárigeri Tájǵalieva 2018 jyly týǵan sábige tiisti meditsinalyq kómek kórsetpegen.
"Dárigerlerdiń kásibi mindetine nemquraidy qaraýy jáne olardy tiisinshe oryndamaýy saldarynan bala qaitys boldy. Sottalýshylardyń kinási jábirlenýshi, kýágerler jáne saraptama qorytyndysy, mamandar aiǵaǵymen rastaldy", - dep túsindirdi sottyń baspasóz qyzmeti ókilderi.
Prokýror barlyq sottalýshyny dárigerlik qyzmetpen ainalysý quqyǵynan 3 jyl merzimge aiyra otyryp, 2 jyl 6 ai merzimge bas bostandyǵynan aiyrý túrindegi jaza taǵaiyndaýdy jáne raqymshylyq jasaý aktisi negizinde onsha aýyr emes qylmys jasalǵandyqtan, olardy negizgi jazadan bosatýdy suraǵan.
Jábirlenýshi tarap dárigerlerge qatań jaza taǵaiyndaýdy surady. Al, sottalýshylar taǵylǵan aiypqa kelispedi jáne aqtaýdy surady.
"Sot jaza taǵaiyndaý kezinde jazany jeńildetetin barlyq mán-jaidy, aýyrlatatyn mán-jaidyń bolmaýyn, qylmysqa qatysýshylardyń árqaisynyń áreketin eskerdi. Osyǵan bailanysty barlyq sottalýshyǵa abaisyzda adam ólimine ákep soqqan is-áreket jasaǵany úshin 2 jyl 6 ai merzimge bas bostandyǵynan aiyrý túrindegi negizgi jaza taǵaiyndaldy. Zulqashevqa dárigerlik qyzmetpen ainalysý quqyǵynan aiyrý túrinde 3 jylǵa, Tileýǵaliev, Adrisov, Tájǵalievaǵa 2 jylǵa qosymsha jaza taǵaiyndaldy. "Qazaqstan Respýblikasy Táýelsizdiginiń 30 jyldyǵyna bailanysty raqymshylyq jasaý týraly" zańǵa sáikes olar bas bostandyǵynan aiyrý túrindegi jazadan bosatyldy, óitkeni Qylmystyq kodekske sáikes bul áreket onsha aýyr emes qylmystarǵa jatady. Is boiynsha azamattyq talap qoiylmaǵan", - dedi vedomstvonyń baspasóz qyzmeti ókilderi.
Sot úkimi zańdy kúshine engen joq jáne oǵan shaǵym jasalýy múmkin.
