Foto: Kazakh Tourism
26 shildede Atyraý oblysy Qurmanǵazy aýdanyna qarasty Teńiz aýylynda erekshe tabiǵi qubylysqa arnalǵan «LOTUS FEST-2025» halyqaralyq festivali bastalady. Is-shara Qiǵash ózeniniń boiynda tabiǵi ortada ósetin lotostyń gúldeý kezeńimen tuspa-tus kelip otyr. Kelýshiler 26 tamyzǵa deiin sirek kezdesetin sulýlyqty tamashalaýǵa múmkindik alady, dep habarlaidy Ult.kz.
Lotostyń gúldeýi — Atyraý jazyndaǵy basty tabiǵi oqiǵalardyń biri. Keibir gúlderdiń biiktigi 2 metrge deiin jetip, japyraqtarynyń diametri 60 sm-ge ulasady. Gúlderge ziian keltirmeý úshin arnaiy baqylaý alańy ornatylady.
Festival aiasynda tabiǵi sulýlyqpen qatar, qazaq halqynyń mádenieti men sporttyq dástúrleri de nasihattalady. Qonaqtar úshin etnoaýyl boi kóterip, teatrlandyrylǵan qoiylymdar, qolóner sheberleriniń kórmeleri men sheberlik sabaqtary usynylady.
Belsendi demalysty unatatyndar úshin ulttyq jáne zamanaýi sport túrlerinen jarystar uiymdastyrylady. Atap aitqanda:
-
Qazaqsha kúres
-
Asyq atý
-
Sadaq atý
-
Arqan tartý
-
Armrestling
«LOTUS FEST-2025» — tek tabiǵatpen qaýyshý ǵana emes, qazaqtyń bai rýhani jáne mádeni álemimen tanysýǵa tamasha múmkindik. Festival ishki jáne sheteldik týristerdi tartý arqyly óńirdiń týristik áleýetin de arttyrýdy kózdeidi.
