Atyraý oblysynda Kaspii teńiziniń jaǵalaýynda qustar qyrylyp jatyr. Qazir ólgen qustardyń sany 5 250-ge jetti, dep habarlaidy QazAqparat.
Qara shubar tuqymdy shaǵalanyń jappai qyrylý deregi Kaspii teńizindegi «Qashaǵan» ken ornynda ornalasqan eki jasandy aralda anyqtalǵan. Qyrylǵan qustardyń sany – 2 750.
Osyǵan orai, Atyraý oblystyq Orman sharýashylyǵy jáne janýarlar dúniesi aýmaqtyq inspektsiiasynda qustardyń ólý sebepterin anyqtaý úshin komissiia quryldy. Komissiia músheleri qustar qyrylǵan jerge baryp, onda profilaktikalyq tekserýler júrgizdi. Sol jerden sý, topyraq jáne aýa synamalary, qustardyń ólekseleri zertteýge alyndy.
«Bes kúnnen keiin, iaǵni 24 maýsymda Aýyl sharýashylyǵy ministrligi veterinariialyq baqylaý jáne qadaǵalaý komitetiniń veterinariia boiynsha ulttyq referenttik ortalyǵynan ólgen qustardyń synamalarynan «AN5 qus tumaýyna» oń nátije anyqtalǵany týraly jaýap keldi. Osyǵan bailanysty Atyraý oblysynyń aýmaǵynda quzyretti organdardyń qatysýymen uqsas jaǵdailardy anyqtaý maqsatynda tolyq baqylaý monitoringi júrgizildi. 26 maýsymda Kaspii teńiziniń soltústik bóliginde ornalasqan Shalyga aralyndaǵy «Aqjaiyq» memlekettik tabiǵi rezervatynyń aýmaǵynda 2500 shaǵalanyń ólý deregi anyqtaldy. Onyń ishinde 1000 «Chegrava», 1 200 «Qara bas ógizshaǵala», 300 «Ógizshaǵala» tuqymdy qus qyrylǵan», - dep málim etti oblystyq ákimdiktiń baspasóz qyzmetinen.
«Aqjaiyq» memlekettik tabiǵi rezervatynyń aýmaǵynda ólgen qustardyń ólý sebebin anyqtaý úshin biomaterialdar alyndy. Biomaterialdar Almaty qalasyndaǵy Mikrobiologiia jáne virýsologiia institýtyna jiberildi.
Qustardyń qyrylý sebebi synamalar qorytyndysy shyqqannan keiin qosymsha habarlanatyn bolady. Qazir Atyraý oblysynyń aýmaǵynda qustardyń jaǵdaiyna tolyq monitoring júrgizilip jatyr», - dep habarlady ákimdiktiń baspasóz qyzmeti.
