Atyraý oblysynda jyl basynan beri koronavirýs infektsiiasynan 233 adam qaitys bolǵan, dep habarlaidy "Ult aqparat".
Oblystyq densaýlyq saqtaý basqarmasy basshysynyń orynbasary Qaisar Abdalievtiń aitýynsha, Atyraýda kúrdeli epidemiialyq ahýal qalyptasyp otyr.
«Sońǵy 7 táýlikte koronavirýs infektsiiasyn juqtyrǵandar sany 30%-ǵa artty. Máselen, 16 shildede 342, 22 shildede 489 adam koronavirýs infektsiiasyn juqtyrdy. Osyǵan bailanysty 414 rezervtik tósek-orynnyń 99%-y naýqastarǵa toldy», - deidi Qaisar Abdaliev.
Onyń málimetinshe, byltyr koronavirýs infektsiiasynan 110 adam qaitys bolǵan. Al, biylǵy qańtardan beri qaitys bolǵandar adamdardyń sany 233-ke jetken.
«Atyraý oblysynda 67 naýqas jansaqtaý bóliminde emdelýde. Onyń ishinde 54 adamnyń jaǵdaiy aýyr, 13 naýqas óte aýyr halde jatyr. Naýqastardyń arasynda 11 patsient ókpeni jasandy jeldetý apparatyna qosylǵan», - dep málim etti Qaisar Abdaliev.
