Búgin Atyraýda oblystyq ákimdik pen «Ekologiialyq uiymdar qaýymdastyǵy» ZTB arasynda seriktestik týraly memorandým jasaldy, dep habarlaidy "Ult aqparat".
«Ekologiialyq uiymdar qaýymdastyǵy» zańdy tulǵalar birlestiginiń tóraiymy Aigúl Solovevanyń aitýynsha, bul memorandým aimaqtyń ekologiialyq problemalaryn sheshýge septigin tigizedi. Sonyń ishinde, óńirdegi qorshaǵan ortany qorǵaýǵa baǵyttalǵan sharalar keshenin talqylaý, qabyldaý, iske asyrýǵa mán berilmek. Atmosferaǵa ártúrli kózderden taraityn kómirqyshqyl gazyn azaitý boiynsha ekologiialyq, zertteý jumystary jáne monitoring júrgizý úshin áleýmettik tapsyrysty qalyptastyrý da kózdeledi.
Oblys aýmaǵynda turǵyndardyń ekologiialyq qaýipsizdigin saqtaý maqsatynda tabiǵat qorǵaý baǵdarlamalary men investitsiialyq jobalardy daiyndap, júzege asyrý da memorandýmda kórsetilgen. «Biz ózara seriktestikke niettimiz. Problemalyq máseleler bar, olardy sheshý úshin álemdik tájiribemen bólisýge daiynbyz. Qazir jańa Ekologiialyq kodeks boiynsha jumys istep jatyrmyz, jańa qaǵidalar, jańa tásilder bar. Bárińizdi osy mańyzdy qujatty júzege asyrýǵa qatysýǵa shaqyramyn», - dep atap ótti Aigúl Soloveva.
Atyraý oblysynyń ákimi Nurlan Noǵaev ekologiialyq problemalardy birlesip sheshý úshin bul memorandýmnyń mańyzdy ekenin aitty.
«Aimaqtaǵy ekologiialyq ahýalǵa bailanysty máselelerdi sheshý bizdiń bárimiz úshin mańyzdy. Jer qoinaýyn paidalanýshy kásiporyndardyń qorshaǵan ortaǵa áserin tómendetý boiynsha keshendi jumystar júrip jatyr. Balamaly energetika bizdiń óńirde de engizilýde. Isatai aýdanynda qýaty 52 megavatt alǵashqy jel elektrstansasy salynyp jatyr. Oblystaǵy sý aidyndarynda ekologiialyq sipattaǵy máseleler bar. Bul máselelerdiń bárin qoǵamdyq uiymdardy jumyldyrý arqyly jariia túrde sheshýimiz kerek. Sizderdiń qatysýlaryńyz biz úshin óte mańyzdy. Tájiribelerińiz ben bilimderińiz óńirdegi qorshaǵan ortany saýyqtyrýǵa septigin tigizedi degen senimdemiz», - dedi Nurlan Noǵaev.
