Atyraý oblysynda 16 dáriger jaldamaly páterden shyǵarý týraly habarlama alǵanyn aityp shaǵymdandy, - dep habarlaidy Tengrinews.kz tilshisi "KTK" telearnasyna silteme jasap.
Meditsina qyzmetkerleri alty jyl buryn memlekettik baǵdarlama boiynsha turǵyn úi alǵan. Endi olardan resmi túrde úi-jaidy bosatý suralyp otyr.
"22 qazanǵa deiin páterdi bosatýymyz kerek. Olar QR zańynyń 107-babyna silteme jasap otyr. Bul zańda toǵyz tarmaq bar: buzaqylyq, aiǵailaý, shý nemese úshinshi tulǵalarǵa jalǵa berý. Biraq onyń bizge esh qatysy joq. Memlekettik organdar mundai habarlamalardy negizsiz, dálelsiz qalai jiberedi?", - deidi Jylyoi aýdandyq aýrýhanasynyń dárigeri Laýra Ǵanieva.
Ashýly dárigerler ondai áreketke barmaǵandaryn aitady. Olardyń aitýynsha, turǵyndar arasynda kópbalaly otbasylar men jalǵyz bala tárbielep otyrǵandar, zeinet jasyna deiingi dárigerler de bar. Olar munyń bári jas mamandar úshin jasalyp otyrǵanyna senimdi. Hat túskennen beri jalǵa alýshylardyń mazasyz qashqan. Ákimdiktegiler turǵyndar durys túsinbei qalǵanyn, kóshirý tártipbuzýshylarǵa ǵana qaýip tóndiretinin túsindirdi.
"Bul habarlama memlekettik baǵdarlama boiynsha turǵyn úi alǵandardyń barlyǵyna kelgen. Adamdar páterlerinde turyp jatyr. Olardy eshkim májbúrlemeidi. Páterlerdi maqsatsyz paidalaný deregi tirkelse, sot arqyly máselelerdi sheshemiz", - dedi Jylyoi aýdanynyń TKSh bóliminiń basshysy Erkebulan Aqqysov.
