Atyraý Halyqaralyq áýejaiynda ushqysh, Halyq qaharmany Hiýaz Dospanovaǵa eskertkish taqta ornatyldy, dep habarlaidy "Ult aqparat".
Biyl Úkimet qaýlysymen Atyraýdaǵy Halyqaralyq áýejaiǵa qazaqtyń ushqysh qyzy, Halyq qaharmany Hiýaz Dospanovanyń esimi berilgen bolatyn. Qazir áýejai ǵimaratyna qaharman ushqyshtyń esimi jazylǵan. Al búgin áýejai aldyna ornatylǵan memorialdyq taqta saltanatty jaǵdaida ashyldy.
«Ekinshi dúniejúzilik soǵys halqymyzǵa ońai bolmady. Milliondaǵan bozdaq maidan dalasynda máńgilikke qaldy. Jaralanyp oralǵandar densaýlyǵyn joǵaltty. Soǵysta qaaqtyń qaisar qyzdary da erliktiń qaitalanbas úlgisin kórsetti. Sonyń biri – dańqty ushqysh Hiýaz Dospanova. Onyń áýeden soqqy jasaýdaǵy erligi elimizdiń Halyq Qaharmany ataǵymen laiyqty baǵalandy. Biyl Atyraýdaǵy halyqaralyq áýejai batyrdyń esimi berildi. Biz árkez dańqty maidangerlerimizdiń erligin keiingi urpaqqa keńinen nasihattap, qurmet tutamyz», - dedi oblys ákimi Mahambet Dosmuhambetov.
Oblystyq ardagerler keńesiniń tóraǵasy Qatimolla Rizýanovtyń aitýynsha, óńirde dańqty ushqyshtyń erligin nasihattaý qolǵa alynǵan. Sonyń qatarynda Hiýaz Dospanova atyndaǵy medal da bar.
