Parlament Májilisiniń jalpy otyrysynda depýtat Artýr Platonov barlyq deńgeidegi attraktsiondarǵa júieli qadaǵalaýdy qamtamasyz etýdi surady, dep habarlaidy QazAqparat.
«Qaraǵandyda eki balanyń anasy «tarzankadan» sekirip kóz jumdy. Keshe buqaralyq aqparat quraldarynda attraktsion nusqaýshysy ustalǵany habarlandy. «Nur Otan» fraktsiiasynyń depýtattary demalys ári oiyn-saýyq saiabaqtarynyń, attraktsiondardyń tehnikalyq jaǵdaiyna, balalar alańdary qyzmetin baqylaý máseleleri boiynsha júieli sharalar qabyldaý úshin buǵan deiin birneshe ret Úkimetke úndeý jasaǵan edi», - dedi A. Platonov Premer-Ministrdiń orynbasary Romana Skliardyń atyna joldaǵan saýalynda.
Osy oraida ol qaiǵyly oqiǵalardy tekserý kezinde atalǵan jabdyqtardy ornatýda erejeni óreskel buzý faktileri anyqtalyp otyratynyn aitty. Óz kezeginde jergilikti atqarýshy organdar atalǵan jabdyqtardy ornatýǵa ruqsat bermegenin nemese basqa da túsiniktemelerdi aityp aqtalyp jatady.
Depýtattyń aitýynsha, attraktsiondardy maýsym aldynda jáne josparly tekserýdi júrgizý tártibiniń esebi men baqylaýy bolmai tur.
«Attraktsiondar esepke qoiylýy tiis. Alaida el boiynsha qansha nysan esepke qoiylmaǵan? Reglamentte tapsyrylǵandai, qurylǵan komissiialar tarapynan qanshasy tekserildi? Attraktsiondardyń barshasyna qajetti aktiler jasaldy ma? Qurylǵan normativtik bazaǵa qaramastan, eldegi jaǵdai ózgere qoimady. Osyndai nysandarda balalar men eresekter qaiǵyly jaǵdaiǵa tap bolyp jatyr, iaǵni bul turǵyda jaýapkershiliktiń joq ekenin kórip turmyz», - dedi depýtat.
Bul turǵyda depýtattar kelesi usynystardy aitty:
1. Barlyq deńgeide júieli baqylaýdy qamtamasyz etý myńyzdy. Bul rette balalar men ereksekterdiń qaýipsizdigine, jabdyqtyń sapasyna jekelei jaýapkershilikti bekitý;
2. Osy salada baqylaýǵa jaýap beretin sheneýnikterdi jazaǵa tartý;
3. Ár óńir boiynsha attraktsiondardy litsenziialaý týraly málimetterdi berip, ákimdik aiqyndaǵan naqty laýazym ielerin kórsetý.
Eske sala keteiik, jaqynda Qaraǵandyda 25 metr biiktikten «tarzankadan» sekirgen áiel kóz jumdy.
12 qazan kúni Qaraǵandyda qonaqúidiń shatyryna ornatylǵan attraktsionda áieldiń qaza bolý isine bailanysty kúdikti ustaldy.
