QR Syrtqy ister ministri Beibit Atamqulov Birikken Ulttar Uiymy Damý baǵdarlamasynyń (BUUDB) Qazaqstandaǵy jańa Turaqty ókili Iakýp Berishti qabyldady, dep habarlaidy "Ult aqparat".
«Kezdesý barysynda 2016-2020 jyldarǵa arnalǵan besjyldyq baǵdarlama, 2030 jylǵa deiingi Damý kún tártibi men Ornyqty damý maqsattaryn (ODM) júzege asyrý, sonymen qatar Damýǵa resmi kómektiń ulttyq júiesin damytý sheńberindegi yntymaqtastyq máseleleri talqylandy.
Syrtqy saiasi vedomstvosynyń basshysy Qazaqstan Úkimeti ODM-dy júzege asyrý boiynsha júieli jáne maqsatty jumystar júrgiziletinin habarlady. Osy jyldyń shilde aiynda bizdiń elimiz Niý-Iork qalasyndaǵy joǵary deńgeidegi saiasi forým aiasynda ODM-dy júzege asyrý boiynsha alǵashqy erikti ulttyq sholýdy usyndy», - delingen QR SIM aqparatynda.
Ia. Berish QR men BUUDB yntymaqtastyǵynyń únemi artyp kele jatqanyn qanaǵattanarlyqpen atap ótiip, ministrdi BUUDB qyzmeti, Qazaqstanda ótkizilip jatqan is-sharalar men jobalar týraly habardar etti. Sonymen qatar ol Qazaqstan Úkimetine Almaty qalasynda BUU-nyń túrli agenttikteri ornalasqan jańa ǵimarat úshin alǵysyn bildirdi.
«Sol kúni SIM basshysy BUU IýNISEF Balalar qorynyń jańadan taǵaiyndalǵan Qazaqstandaǵy Ókili Artýr van Dizenmen kezdesti. IýNISEF Balalar qoryna Qazaqstan Úkimetine balalardy qorǵaý máseleleri boiynsha kórsetip jatqan qolǵabys úshin alǵys bildirildi. 2019 jyly IýNISEF Qory memleketimizde iývenaldy ádiletti damytý, balalarǵa meiirimdi sot tóreligin qurýǵa baǵyttalǵan baǵdarlamalar men jobalardy júzege asyrý arqyly Qazaqstan Úkimetimen yntymaqtastyǵyn belsendi jalǵastyryp keledi», - dedi vedomstvodan.
BUU damý baǵdarlamasy (BUUDB) QR aýmaǵynda áreket etetin BUU-nyń eń iri agenttigi bolyp tabylady. BUUDB Qazaqstanǵa kómek kórsetý baǵdarlamasyn 1993 jyly bastady. 1994 jyly qazanda QR Úkimeti men BUUDB arasynda Qazaqstandaǵy baǵdarlama qyzmetiniń basym baǵyttaryn qamtityn yntymaqtastyq týraly kelisimge qol qoiyldy.
IýNISEF óz jumysyn Qazaqstanda 1992 jyly bastady. 1999 jyly Almatyda Ortalyq Aziia elderi men Qazaqstan boiynsha aimaqtyq ofis ashyldy, 2001 jyly Nur-Sultanda keńse ashyldy.
