Búgingi kúni balalardy birinshi synypqa qabyldaýǵa 390 myńǵa jýyq ótinish tústi. Onyń ishinde balalardyń 70%-y memlekettik tilde oqýdy tańdady, dep habarlady "Ult aqparat" Oqý-aǵartý ministrligine silteme jasap.
Birinshi synypqa ótinishterdi qabyldaý 1 sáýirde bastalǵan bolatyn. Al qujattardy qabyldaý merzimi 2022 jylǵy 1 tamyzda aiaqtalady. Odan keiin mektepterge synyptardy qalyptastyrýǵa sapaly daiyndyq jumystaryn júrgizýge jáne oqý úrdisin uiymdastyrýǵa ýaqyt beriledi.
«Qujattardy qabyldaý merziminiń aiaqtalýyna sanaýly kúnder qaldy. 1 sáýirden bastap 4 ai boiy BAQ-ta da, áleýmettik jelilerde de 1 tamyzǵa deiin qujattardy tapsyrý qajettigi týraly habarlap kelemiz. Áli ótinish berip úlgermegender 1 tamyzǵa deiin qujat tapsyra alady. Qazir kóptegen memlekettik bilim berý qyzmeti elektrondy formatta qoljetimdi, sol sebepti egov.kz veb-portaly arqyly ótinish jiberýge bolady. Sonymen qatar ata-analardyń ótinishi boiynsha qujattardy dástúrli qaǵaz formatynda da tapsyrý múmkindigi bar», - dep túsindirdi QR Oqý-aǵartý ministrligi Mektepke deiingi jáne orta bilim komitetiniń tóraǵasy Gúlmira Kárimova.
Balalardy qazaq synyptaryna qabyldaý boiynsha joǵary kórsetkish Qyzylorda (89,7%), Batys Qazaqstan (85,4%), Mańǵystaý (87,6%) jáne Jambyl oblystarynda baiqalady.
Jańa oqý jylynda 405-410 myńǵa jýyq bala 1-synypqa barady dep kútilip otyr.
