Bilim jáne ǵylym ministrligi ata-analardyń balasymen áńgimelespeitinin alǵa tartyp, dabyl qaqty, dep habarlaidy QazAqparat tilshisi.
«Ata-ana internetten bir aqparatty nemese qanatty sózdi oqyp alyp, ózin bilimdi sanaityn jaǵdailar kezdesip jatady. Biz qazirgi ýaqytta ata-analardyń balalarymen ashylyp sóilespeý máselesimen betpe-bet kelip otyrmyz. Balalar gadjetterge ainalyp, ózimen ózi bolyp ketti. Qazir otbasylyq qarym-qatynasta mynadai tendentsiia baiqalady: ata-ana jatyn bólmeden shyǵyp, jumysqa ketedi - jumystan qaityp kelip, balasymen az ǵana áńgimelesip, tamaqtanǵasyn qaitadan jatyn bólmesine tartady», - dedi QR Bilim jáne ǵylym ministriniń keńesshisi Mairash Toikenova elordada ótken dóńgelek ústel barysynda.
Onyń aitýynsha, buryn ata-analar men balalar jii syrlasyp, oi almasatyn.
«Ata-anamyz bizge kóńil aýdaryp, kúndelikti ómirimiz týraly kóbirek suraityn. Odan qaldy, áke-sheshelerimiz aýlada oiyn uiymdastyratyn. Múmkin, ata-analar «qazir zaman basqa, ýaqyt joq» deitin shyǵar, degenmen ol bóten bireýdiń emes, sizdiń balańyz ǵoi», - deidi ol.
Ministrdiń keńesshisiniń aitýynsha, ár ata-anaǵa óz balasyna durys qaraý kerektigin túsindirý qajet.
«Bizdiń qoǵamnyń problemasy nede? Júz ustazdan bir ákeniń tálimi artyq. Al bizde balalardy mektepke seif sekildi ákelip tastaidy da, 11 synypta damyǵan, tárbieli bala bolyp shyqqanyn qalaidy», - deidi keńesshi.
