Foto: primeminister.kz
Premer-Ministr Álihan Smaiylovtyń tóraǵalyǵymen ótken Úkimet otyrysynda bilim berý uiymdarynda qaýipsizdikti qamtamasyz etý jónindegi sharalar qaraldy, dep habarlaidy "Ult aqparat" primeminister.kz saityna silteme jasap.
Oqý-aǵartý ministri Ǵani Beisembaev 2020 jylmen salystyrǵanda respýblikada beinebaqylaý júielerimen qamtamasyz etilgen bilim berý uiymdarynyń sany 2,5 esege, litsenziialanǵan kúzeti 7 esege jáne eskertý túimeleri 21 esege artqany týraly baiandady. Búgingi tańda osy baǵyttardaǵy jumys jalǵasýda.
Sonymen qatar, balalardyń qaýipsizdik júiesin jetildirý úshin bilim berý uiymdaryndaǵy birinshi basshylardyń derbes jaýapkershiligin kúsheitý, olardaǵy baqylaý-ótkizý rejiminiń tártibin aiqyndaý, daǵdarys jaǵdaiynda qaýipsiz minez-qulyq daǵdylaryn qalyptastyrýǵa basa nazar aýdara otyryp, tárbie jumysyn qaita formattaý jáne pedagogtardy daiarlaý men qaita daiarlaý baǵdarlamasyna jańa taqyryptyq modýldi engizý josparlanýda.
Ishki ister ministri Marat Ahmetjanov atap ótkendei, elimizde bilim berý obektilerin terrorizmge qarsy qorǵaý jónindegi Nusqaýlyq bekitilgen. Onyń sheńberinde 300-ge deiin oqýshysy bar mekemelerde beinebaqylaý jáne qulaqtandyrý júieleri bolýy tiis, al 700 adamǵa deiingi obektilerde – beinebaqylaýlardy jedel basqarý ortalyqtaryna (JBO) qosý jáne dabyl túimelerin ornatý, 700-den astam adamy bar jáne oblys ortalyqtarynyń barlyq mektepterinde týrniketter men qosymsha litsenziialanǵan kúzetpen shart bolýy tiis. Búgingi tańda QR TJM-men birlesip barlyq bilim berý uiymdaryna keshendi tekserý júrgizilýde.
Óńirlerde júzege asyrylyp jatqan sharalar týraly Soltústik Qazaqstan oblysynyń ákimi Aidarbek Saparov, Aqtóbe oblysynyń ákimi Eraly Toǵjanov jáne Abai oblysynyń ákimi Nurlan Ýranhaev baiandama jasady.
Premer-Ministr baiandamashylardy tyńdap, Balalardyń qaýipsizdigin qamtamasyz etý máselesi – memlekettiń asa mańyzdy mindetteriniń biri ekenin atap ótti.
«Ata-ana mekteptegi balasynyń jaǵdaiy men qaýipsizdigi úshin alańdamaýy qajet», — dedi Álihan Smaiylov.
Onyń aitýynsha, bul baǵytta normativtik te, uiymdastyrý jaǵynan da barlyq deńgeide júieli sharalar qabyldanýda. Memleket basshysynyń tapsyrmasyna sáikes Balalardy qorǵaý jónindegi keshendi jospardyń jobasy ázirlendi. Bilim berý uiymdaryn dabyl knopkalarymen jáne beinebaqylaý júielerimen jabdyqtaýǵa, olardy politsiia bólimshelerine qosýǵa, litsenziialanǵan kúzetpen qamtamasyz etýge qoiylatyn talaptar kúsheitildi.
«Bilim berý uiymdarynda qaýipsizdik talaptarynyń saqtalýyna turaqty túrde monitoring júrgizilýi tiis», — dedi Premer-Ministr.
Sonymen qatar atqarylǵan sharalarǵa qaramastan, óńirlerde problemalar áli de jetkilikti. Beinebaqylaý ornatylǵan mektepterdiń arasynda kameralary standarttar men tehnikalyq talaptarǵa sáikes kelmeitin mektepter de bar. Elimizdegi 1100-ge jýyq mektep politsiianyń jedel basqarý ortalyqtaryna qosylmaǵan. Baqylaý rejimi qatań saqtalmaidy.
«Túrkistan jáne Soltústik Qazaqstan oblystaryndaǵy mektepterde litsenziialanǵan kúzet qyzmetterimen kelisimder jasalmaǵan. Kúzetke kóbinese arnaiy daiarlyqtan ótpegen adamdar tartylady. Osy máselelerdiń barlyǵyn dereý sheshý kerek. Óitkeni bul – balalarymyzdyń qaýipsizdigi», — dep atap ótti Álihan Smaiylov.
Osyǵan bailanysty Úkimet basshysy osy jyldyń 1-shi sáýirine deiin mektepterdi tiisti qaýipsizdik júielerimen jabdyqtaý jumystaryn aiaqtaýy qajettigin aitty.
«Bul politsiianyń jedel basqarý ortalyqtaryna shyǵatyn beinebaqylaýǵa, mamandandyrylǵan kúzetpen jáne dabyl knopkalarymen qamtamasyz etýge qatysty», — dedi Úkimet basshysy.
Sonymen qatar Premer-Ministr úsh kún merzimde Úkimetke balalardy qorǵaý jónindegi keshendi jospardyń pysyqtalǵan jobasyn engizýdi tapsyrdy, oǵan ýákiletti organdardyń vedomstvoaralyq ózara is-qimyl algoritimin jetildirý jónindegi is-sharalar kirýi tiis.
