Semei qalasyndaǵy qalalyq mádeniet saraiynda el Táýelsizdiginiń 25 jyldyǵyna orai «Aisha Bibi» halyqtyq folklorlyq ansambli ujymynyń tóraiymy Aiman Boqbasarovanyń uiymdastyrýymen «Asyl analar – ǵajaiyp jandar» atty kesh bolyp ótti.
- Elbasymyz Nursultan NAZARBAEVTYŃ eren eńbeginiń arqasynda eńsemiz biiktep, rýhymyz shalqi tústi. Memleketimiz aiaǵyn nyq basty. Qazaq elin álem tanýda. Halqymyz beibitshilikte ómir súrip jatyr. Sonyń bir aiǵaǵy - irgesi 2002 jyly qalanǵan bizdiń ujymnyń alty birdei anasy 70 jasqa tolyp, solardyń qurmetine arnalǵan mereitoilyq keshke jinalyp otyrmyz, - dedi sahna shymyldyǵy ashylarda sóz alǵan Aiman Ibyraiqyzy kópshilikke búgingi basqosýdyń maqsatyn tanystyryp. Sol-aq eken sahnaǵa keremettei sándi kiingen, qulpyryp jasarǵan asyl analar birinen soń biri qurmetti orynǵa jaiǵasty. Keshti júrgizýshi Mádeniet úiiniń qyzmetkeri Áigerim Qasymbekova arnaiy kelgen qonaqtar men mereitoi ielerin kezegimen tanystyrdy. Olardyń qai-qaisysy bolsa da úlken qurmet pen maqtaýǵa laiyq. Mysaly, Kúlán Abdoldinova – ómirin ustazdyqqa arnaǵan jan, aǵylshyn tiliniń mamany. Ánshilik ónerge jasynan áýes bolyp, oblystyq, respýblikalyq baiqaýlarda úzdik ánshi atanǵan Kúlánniń nemeresi Zinýra Ǵalymqyzy da Túrkiiada, Eýropa elderinde, Reseide, Qytaida án shyrqap, áje jolyn ustanyp, qazaqtyń halyq ánderin shetelge tanytyp júr. Marjan Isenbaeva Qazaq Ulttyq konservatoriiasynda oqyǵan. Aiagóz qalasy Mádeniet úiinde uzaq jyl eńbek etip, zeinetkerlikke shyqqan. Al Baqytjamal Baltabaiqyzy ánshi ári qolóner sheberi. Nurysh Qasenqyzy da esep qyzmetkeri bolǵanymen jasynan ónerge, ásirese ánge qumar bolyp, el ishinde esepshi-ánshi atanǵan jan. Kámshat Beisenbaiqyzy uzaq jyldar Semei terikombinatynda tiginshi bolǵan. Biraq óner dese ishken asyn jerge qoiady. Sonymen qatar, qazir osy ujymda jastarǵa qolónerden jetekshilik etedi. Burynǵy Aqsýat aýdanynyń týmasy Kúlásh Tóleýbaevanyń da mamandyǵy muǵalim. Qolóner sheberi. Neshe dúrkin aimaqtyq kórmelerge qatysyp, júldelerge ie bolǵan. Ánshiligi qyzy Zerege qonǵan. Ol Túrkiiada ótken jas ánshiler festivaliniń júldegeri. Al kishi uly Áli – qolóner sheberi. Tanystyrýdan soń, quttyqtaýshylar sóz aldy. Semei qalalyq mádeniet jáne tilderdi damytý bóliminiń basshysy Berik Kópbaev mereitoi ielerin quttyqtap, alǵys hat tapsyrdy.
Aimaqtyq halyqaralyq qazaq tili qoǵamynyń vitse-prezidenti Oral Sháripbaev, «Nevada-Semei» qozǵalysynyń vitse-prezidenti Sultan Kartoev, Óskemen qalalyq dostyq úiiniń direktory Eldar Tóleýbekov sóz alyp, asyl analdardy mereitoilarymen quttyqtap, gúl shoqtaryn usynyp, Alǵys hat tapsyryp, syi-siiapat jasady.
Jiyn sońy úlken kontsertke ulasty. Óz kezeginde toi ieleri osynsha qurmet kórsetken mekeme basshylaryna, zamandas óner ielerine, Aiman Ibyraiqyzyna alǵystaryn aityp, 100 jasqa kelsek te halqymyzǵa óner kórsetip, jastarǵa úlgi-ónege beremiz – dep, kóńildi tarqasty.
Máýitqazy Zúkenov
Semei.
