Astyq egýmen ainalysatyn negizgi aimaqtar jappai egin jinaýdy tamyzdyń úshinshi onkúndiginen bastaidy. Bul týraly Úkimet otyrysynda QR Aýyl sharýashylyǵy ministriniń mindetin atqarýshy Erbol Qarashókeev málim etti, dep habarlaidy "Ult aqparat".
«Biylǵy egin jinaý naýqany ýaqytynda bastaldy. Búgingi kúni respýblika boiynsha barlyǵy 1,5 million gektarǵa jýyq dándi jáne dándi-burshaqty daqyldar nemese kórsetilgen oblystardaǵy jalpy egin jinaý alańynyń 14 paiyzy jinaldy. Ótken jyly dál osy kúnge 1,6 million gektar nemese 15,7 % jinalǵan bolatyn. Ortasha túsimdilik gektaryna 10,1 tsentner qurap, 1,5 mln tonna astyq bastyryldy. Astyq egýmen ainalysatyn negizgi aimaqtar jappai egin jinaýdy osy aidyń úshinshi onkúndiginen bastaidy», - dedi Erbol Qarashókeev .
Onyń aitýynsha, jappai egin jinaý jumystarynyń bastalýyna aýyl sharýashylyǵy taýaryn óndirýshiler barlyq qajetti tehnikany daiyndady. Jalpy respýblikada egin jinaý jumystary úshin 141,7 myń traktor, 73,5 myń traktor tirkemesi, 36,9 myń astyq jinaityn kombain, 12,8 myń egin oraǵy bar.
«Jumystyń uzaq ýaqyt toqtap turýyn boldyrmaý úshin aýyl sharýashylyǵy taýaryn óndirýshiler jóndeý brigadalaryn qurdy. Servistik kompaniialarmen olardyń dalalyq qyzmetin kúsheitý, sonymen qatar qoimalardy qajetti qosalqy bólshektermen tolyqtyrý boiynsha tiisti jumystar júrgizildi. Egin jinaý jumystaryn ýaqtyly júrgizý úshin aýyl sharýashylyǵy taýarlaryn óndirýshilerge 396,5 myń tonna jeńildetilgen dizel otyny bólindi. Energetika ministrligimen birlesip oblystardyń operatorlaryn munai óńdeý zaýyttaryna bekitip berý grafigi jasaldy. Shildedegi kólemderdi óńirler tolyǵymen aldy. Qazirgi ýaqytta tamyz aiynyń kólemderi jóneltilýde», - dedi Erbol Qarashókeev.
