Elordada jyl saiyn 300-den astam otbasyn apatty úilerden jańa baspanaǵa kóshirý josparlanyp otyr. Bul týraly «Nur Otan» partiiasynyń jańa múshelerine partiialyq biletterdi tabys etken qala ákimi Altai Kólginov aitty, dep habarlaidy «Ult aqparat».
«Ótken jyldyń qiyndyqtaryna qaramastan, kóptegen jumystar atqaryldy. Jumys áli de kóp. Partiianyń 2021-2025 jyldarǵa arnalǵan sailaýaldy baǵdarlamasynyń negizine 13 negizgi basym baǵyt alyndy. Mysaly, 2021-2025 jyldar aralyǵynda jyl saiyn 10 myńǵa jýyq jeńildikti áleýmettik páter salý jáne berý, 125 turǵyn úi keshenin jáne 150 liftini jóndeý, 300-den astam otbasyn apatty úilerden qaýipsiz jańa turǵyn úi keshenderine kóshirý josparlanyp otyr.
Budan basqa, 5 jyl ishinde 50 memlekettik mektep salynady, orta jáne joǵary bilim alý úshin granttar sany josparly túrde ulǵaitylady. «Qadamdyq qoljetimdilik» qaǵidaty boiynsha taǵy 30 «úi janyndaǵy dáriger» nysany ashylady, taǵy 5 iri meditsinalyq mekeme salynady», - dedi A.Kólginov.
Sondai-aq qala basshysynyń aitýynsha, aldaǵy jyldarda 130 km sýmen jabdyqtaý jáne sý burý jelileri, 85 km nóser kárizi, qosalqy stantsiia jáne 177 km elektrmen jabdyqtaý jelileri, 23 km jylýmen jabdyqtaý jelileri, 3 keshen nóser kárizderin tazartý qurylystary salynady. Sondai-aq, 6 mektep, birqatar meditsinalyq ortalyq, 4 dene shynyqtyrý-saýyqtyrý kesheni, 50 saiabaq pen skver qurylady, 123 km velosiped joldary tóseledi.
