Hokkeiden astananyń «Barys» komandasynyń taǵy 8 múshesi koronavirýs juqtyrǵany belgili boldy, dep habarlaidy "Ult aqparat".
«Eńbek ujymdarynda koronavirýs indetiniń taralýy alańdatyp otyr. Naqtyraq aitqanda, osy jyldyń 17 qyrkúieginde «Barys» hokkei komandasyndaǵy 40 adamǵa profilaktikalyq jumystar júrgizildi. Onyń ishinde 11 adamnyń koronavirýs juqtyryp alǵany belgili boldy. Dál sol kúni qalanyń bas sanitarlyq dárigeriniń qaýlysy shyǵyp, sol ujymda epidemiologiialyq sharalardy ótkizý týraly sheshim qabyldandy. KVI juqtyrǵandarmen bailanysta bolǵan 29 adam anyqtaldy. Bárine de «Barys-Arenaǵa» kelýge tyiym salyndy», - dedi búgin QR Densaýlyq saqtaý ministrliginiń baspasóz hatshysy Baǵdat Qojahmetov Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, 22 qyrkúiekte komandanyń taǵy 8 múshesinen koronavirýs (olar buryn juqtyrǵandarmen bailanysta bolǵan) anyqtalǵan.
«Qazir komandadaǵy koronavirýs juqtyrǵan 19 adamnyń bári aýrýdy simptomsyz ótkerip jatyr. Ózderińiz kórip otyrǵandai, bul indetti balalar men qarapaiym adamdar ǵana emes, densaýlyǵy myǵym sportshylar da juqtyrýda», - dedi ol.
Eske sala ketsek, buǵan deiin «Barys» hokkei klýbynyń birneshe oiynshysynan koronavirýs anyqtalǵan edi. Osyǵan bailanysty hokkei klýby aldaǵy kezdesýlerin keiinge shegerýge májbúr bolyp otyr.
