Elorda kúni qarsańynda Astana týrizm salasyndaǵy joǵary kórsetkishterin jariialady. 2025 jyldyń qorytyndysy boiynsha bas qalaǵa 1,6 million týrist kelse, týristik salaǵa tartylǵan investitsiia kólemi 438,3 mlrd teńgege jetti, dep habarlaidy ult.kz.
Ótken jyly Astanaǵa kelgen týristerdiń 380 myńnan astamy sheteldik qonaqtar boldy. Al 2026 jyldyń alǵashqy toqsanynda elordaǵa 352,2 myń adam saiahattap kelgen. Bul ótken jyldyń osy kezeńimen salystyrǵanda 12 paiyzǵa artyq. Onyń ishinde 67,9 myń týrist – shetel azamattary.
Astanaǵa eń kóp keletin týrister Resei, Qytai, Túrkiia, Germaniia jáne AQSh elderinen. Sonymen qatar Ózbekstan, Birikken Arab Ámirlikteri jáne ózge memleketterden kelýshiler sany da artyp keledi.
Týrizm salasyna quiylǵan investitsiia kólemi de turaqty ósim kórsetip otyr. 2025 jyldyń qorytyndysynda salaǵa tartylǵan investitsiia 438,3 mlrd teńgege jetip, bul kórsetkish boiynsha Astana óńirler arasynda kósh bastady. Biylǵy qańtar-mamyr ailarynda týristik jobalarǵa 250 mlrd teńge investitsiia salynyp, ótken jyldyń sáikes kezeńimen salystyrǵanda eki esege artqan.
Qazir elordada jalpy quny 265,7 mlrd teńgeni quraityn 33 investitsiialyq joba iske asyrylýda. Olardyń qatarynda halyqaralyq qonaqúi jelileriniń qurylysy, ekotýrizmdi damytý jáne zamanaýi týristik infraqurylymdy qalyptastyrý bastamalary bar.
Oqiǵaly týrizm de Astananyń tartymdylyǵyn arttyryp keledi. 2026 jyldyń alǵashqy úsh aiynda qalada 300-den astam is-shara uiymdastyrylsa, onyń 11-i halyqaralyq deńgeide ótti. Aldaǵy ýaqytta BaiQymyz etno-gastronomiialyq festivali, Comic Con Astana, «Bolashaq oiyndary» halyqaralyq týrniri jáne Enrike Iglesiastyń kontserti ótkizilip, myńdaǵan týristi tartý josparlanyp otyr.
Sonymen qatar Astana halyqaralyq týristik keńistiktegi pozitsiiasyn kúsheitip keledi. Biyl qala Germaniia, Qytai jáne Ońtústik Koreiada ótken iri týristik kórmelerge qatysyp, Reseide roýd-shoý uiymdastyrdy. Sondai-aq úsh halyqaralyq týristik uiymnyń quramyna endi.
Mamandardyń aitýynsha, qalada týristik infraqurylym kezeń-kezeńimen jańartylyp, jańa mýzeiler ashylyp jatyr. Buǵan qosa tsifrlyq servister jetildirilip, qalalyq navigatsiia men týristerge arnalǵan qyzmetterdiń sapasy jaqsarýda.
