Foto: Baq.kz
Áleýmettik jelilerde Astanadaǵy «Kórkem-3» turǵyn úi kesheninde bolǵan órt kezinde qutqarýshylardyń áreketsizdigi týraly taraǵan aqparatqa Tótenshe jaǵdailar ministrligi túsinikteme berdi, dep habarlaidy Ult.kz.
Vedomstvo málimetinshe, beinematerialdarda órt sóndirý bólimsheleri oqiǵa ornyna jetkenge deiin-aq páter terezesinen qoiý tútin men jalyn anyq baiqalǵan. Bul órttiń kesh anyqtalǵanyn kórsetedi.
TJM túsindirýinshe, aýlada turǵan jeńil avtokólik tek biiktikte jumys isteitin arnaiy tehnikanyń kirýine ishinara kedergi keltirgenimen, órt sóndirýshilerdiń negizgi is-qimyldaryna tosqaýyl bolmaǵan. Oqiǵa ornyna kelgen sátten bastap gaz-tútinnen qorǵaý qyzmeti adamdardy qutqarý men órtti sóndirý jumystaryn jedel bastaǵan.
Qabyldanǵan sharalardyń nátijesinde janyp jatqan páterden bir áiel qutqarylyp, órttiń joǵarǵy qabattarǵa taralýyna jol berilmegen. Alaida órt sóndirýshiler kelgenge deiin páter tolyqtai jalynǵa oranyp, ýly tútinniń áseri qaiǵyly jaǵdaidyń aldyn alýǵa múmkindik bermegen.
Ministrlik órt sóndirýshilerdiń 20 minýt boiy áreketsiz turǵany týraly aqparat shyndyqqa sáikes kelmeitinin málimdedi.
Sondai-aq vedomstvo qoldanystaǵy zańnamaǵa sáikes órtti sóndirý kezinde qutqarýshylar zańdy túrde áreket etse, keltirilgen zalaldy óteýden bosatylatynyn eske saldy. Degenmen, azamattardyń avtokólikterin ádeii búldirýge quqyq beretin norma zańda qarastyrylmaǵan.
TJM mundai normany zańnamaǵa engizý orynsyz ekenin atap ótti. Sebebi tótenshe jaǵdailarda sheshim qabyldaýdyń naqty ólshemderin belgileý qiyn, al mundai quqyq berý teris paidalanýǵa, quqyqtyq daýlarǵa jáne qosymsha táýekelderge ákelýi múmkin.
Vedomstvo órt sóndirý tehnikasyna jol ashý úshin politsiiamen birlesip, kedergi keltiretin avtokólikterdi evakýatsiialaý tártibi bar ekenin de atap ótti.
