Jelide aq tútek boranda Astana kóshelerinde reportaj jasap jatqan «Qazaqstan» arnasynyń tilshileri týraly video jariialandy, dep habarlaidy "Ult aqparat".
Videony atalmysh telearnanyń basshysy Erlan Qarin Feisbýktegi óz paraqshasyna júktedi.
«Meniń áriptesterim - óz isiniń naǵyz sheberleri. Astananyń búgingi boranynda «Qazaqstan» arnasynyń «jańalyq shyǵarýshylary» qalai jumys istegenin kórińizder», - dep jazdy telearna basshysy.
Aita keteiik, búgin elordada buryn-sońdy bolmaǵan boran saldarynan tabiǵi sipattaǵy tótenshe jaǵdai jariialandy. Kóptegen ǵimarattardyń shatyrlary kókke ushty. Bir táýlikte 60-tan astam jol-kólik oqiǵasy tirkeldi. Qala ákimi Áset Isekeshev astanalyqtar men qala qonaqtaryna úiden shyqpaýǵa keńes berdi. Mektepterde birinshi jáne ekinshi aýysymdaǵy 0-11-synyp oqýshylary men kolledjderdiń 1-2 kýrs stýdentteri úshin sabaq bolǵan joq.
Sinoptikterdiń boljaýyna qaraǵanda, 12 qańtar kúni burqasynnyń beti qaita bastaidy. Batystan, soltústik-batystan sekýndyna 9-14 metr jyldamdyqpen jel soǵyp, túnde aýa temperatýrasy -11...-13 gradýsqa deiin tómendeidi.
