23 qańtar kúni Astana qalasyndaǵy «Nur álem» pavilonynda («EXPO-2017» kórme kesheni) «Táýelsizdiktiń urpaqtary» ataýymen Jastar jylynyń ashylý saltanaty ótedi, dep habarlaidy "Ult aqaparat" QR Qoǵamdyq damý ministrliginiń baspasóz qyzmetine silteme jasap.
Is-sharaǵa Memleket basshysynyń, Úkimet músheleriniń, Qazaqstan Respýblikasy Parlamenti depýtattarynyń, jergilikti atqarýshy organdar basshylarynyń, Qazaqstan Respýblikasy Prezidenti janyndaǵy Jastar saiasaty keńesiniń músheleri, «100 jańa esim» baiqaýynyń jeńimpazdary, «Bolashaq» baǵdarlamasynyń túlekteri, jas ǵalymdar, shyǵarmashylyq, stýdenttik jáne jumysshy jastar ókilderiniń, jas sportshylar, daryndy balalar, zamanaýi media salasynyń ókilderi, balalar úiiniń tárbielenýshileri men túlekteri, erekshe qajettilikteri bar jastar, jas áskeri qyzmetkerler jáne t.b. qatysady dep kútilýde.
Osylaisha, elimizde memlekettik jastar saiasatyn jan-jaqty qoldaý men júzege asyrýǵa baǵyttalǵan aýqymdy is-qimyl josparyn iske asyrý bastaý alatyn bolady.
Is-shara barysynda jas qazaqstandyqtar júzege asyrǵan tabysty jobalar men jańa ónimderderdiń tanystyrylymy ótedi. Spikerler retinde ár túrli salalardaǵy jetistikterge jetken jas qazaqstandyqtar baiandama jasaidy. Máselen, tanymal kásipkerler, startaptar, volonterler, aýyl sharýashylyǵy, ǵylym jáne ádebiet salasyndaǵy mamandar sóz sóileidi dep kútilýde.
Esterińizge sala keteiik, Qazaqstan Respýblikasynyń Prezidenti N.Á.Nazarbaevtyń Jarlyǵymen 2019 jyl jastar jyly dep jariialandy.
