Nur-Sultan qalasynyń ákimi Altai Kólginov onlain rejimde meditsina mekemeleriniń bas dárigerlerimen kezdesý ótkizip, qazirgi jaǵdaidy talqylady, dep habarlaidy "Ult aqparat".
«Álemdik pandemiia adamdardy eki stsenariidiń aldyna qoiady: birinshisi – vaktsina egip, ózin jáne ainalasyndaǵylardy qorǵaý, ekinshisi – indetke shaldyǵý. Ekinshi nusqaǵa keletin bolsaq, adam óziniń densaýlyǵyna qaýipti ári immýnitetti álsiretetin koronavirýs infektsiiasyn jeńe alatynyn aldyn ala bile almaidy. Jaǵdaiǵa nemqurailyqpen qarap, vaktsinatsiiany elemei, ainaladaǵy adamdarǵa virýs juqtyrýy múmkin. Al bul infektsiianyń haotikalyq taralýyna múmkindik beredi. Meditsina qyzmetkerleri vaktsinatsiiany 1 aqpannan bastady. Birinshi kezeńde ekpe indetpen kúreste aldyńǵy shepte júrgen meditsina qyzmetkerlerine, muǵalimderge, tártip saqshylaryna jáne basqalar egildi. 20 myńnan astam adam qamtyldy» dep jazdy shahar basshysy Instagram paraqshasynda.
Onyń aitýynsha, ekinshi kezeńde turǵyndardy vaktsinalaý qarastyrylǵan.
6 sáýirde qala turǵyndary arasynda ekpe alýǵa aldyn ala jazylý bastaldy.
Bul adamdardyń bir mezgilde jinalýyn boldyrmaýǵa, vaktsinalardy meditsinalyq mekemelerge birkelki taratýǵa múmkindik beredi.
«Birinshi. Turǵyndardy jappai vaktsinalaý meditsina qyzmetkerlerinen kásibilikti, jaýapkershilikti talap etedi. Dárigerlerge taǵy bir márte nusqaý berildi. Olar vaktsinany ekpei turyp naýqastyń densaýlyǵyn tekserýi kerek.
Ekinshi. Meditsinalyq mekemelerge qosymsha jabdyqtar ornatyldy: 40-tan astam tońazytqysh qondyrǵylary, vaktsinalardy tasymaldaýǵa arnalǵan 80-nen astam termokonteiner jáne basqa. Egý pýnktileriniń sany 36-dan 100-ge deiin ósti. Vaktsinatsiia pýnkteriniń jumys ýaqyty saǵat 8:00-den 00:00-ge deiin uzartyldy.
Úshinshi. «Mega Silk Way» siiaqty birqatar SOO-da vaktsinatsiia pýnktin ashý úshin infraqurylym daiyndap jatyrmyz. Tirkeý, kútý, tekserý jáne basqa aimaqtar bolady» deidi Altai Kólginov.
Ákimniń sózine qaraǵanda, mundai oryndar adam kóp jinalatyn jerlerde jumys isteitin ujymdardy ýaqytyly qamtýǵa múmkindik beredi, osylaisha olardy qorǵaidy.
Qajet bolǵan jaǵdaida qalanyń qonaq úilerinde de egý pýnkteri ashylady.
«Tek jappai vaktsinatsiia ujymdyq immýnitetti qalyptastyrýa, koronavirýstyń taralýyn toqtatýǵa kómektesedi» dep túiindedi sózin qala basshysy.
