«Qarasora – 2026» respýblikalyq jedel-profilaktikalyq is-sharasy aiasynda Astanada sintetikalyq esirtkiniń iri partiiasy tárkilendi, dep habarlaidy ult.kz.
Ishki ister ministrliginiń málimetinshe, politsiia qyzmetkerleri elordanyń 40 jastaǵy turǵynyn ustaǵan. Tergeý nusqasyna sáikes, ol Telegram messendjeri arqyly esirtki taratqan internet-dúkenniń «qoimashysy» bolǵan.
Kúdiktiniń turǵylyqty jerinde júrgizilgen tintý jáne aldyn ala jasyrylǵan oryndardy tekserý barysynda oraý materialdary, zip-lock paketteri, sondai-aq tórt keliden astam α-PVP men mefedron tárkilendi. Vedomstvonyń baǵalaýynsha, bul 12 myńnan astam bir rettik dozanyń zańsyz ainalymǵa túsýine tosqaýyl bolǵan.
IIM Esirtki qylmysyna qarsy is-qimyl komiteti tóraǵasynyń orynbasary Eldar Ábdikenovtiń aitýynsha, zańsyz ainalymnan alynǵan árbir esirtki partiiasy – aldyn alynǵan qylmystar men saqtalǵan adam ómiri.
Atalǵan derek boiynsha Qazaqstan Respýblikasy Qylmystyq kodeksiniń 297-babynyń 3-bóligimen sotqa deiingi tergep-tekserý bastaldy. Kúdikti ýaqytsha ustaý izoliatoryna qamaldy.
Ministrlik esirtkini jetkizý, saqtaý jáne taratý arnalarynyń jolyn kesý baǵytyndaǵy jumystar jalǵasatynyn málimdedi.
Eske salaiyq, buǵan deiin Almatydaǵy páterlerdiń birinen tolyq jabdyqtalǵan esirtki zerthanasy anyqtalǵan bolatyn.
