Roza Baǵlanova atyndaǵy «Qazaqkontsert» memlekettik akademiialyq kontserttik uiymynda Mádeniet salasynyń úzdigi Maqsat Medeýbektiń «QOBYZ SOUL – DASTUR» atty kontserti ótti.
Kesh barysynda kórermen qobyzdyń bai tarihymen, onyń shyǵý tegi men kórkemdik erekshelikterimen tanysyp, rýhani áserge bólendi. Kontserttik baǵdarlamada Qorqyt, Yqylas, Táttimbet, Muhit, qaraqalpaq, tatar halqynyń jáne t.b. kúiler oryndaldy.
"Jobanyń basty maqsaty – qobyz ónerin keńinen dáriptep,, onyń oryndaýshylyq múmkindikterin tanytý jáne damytý. Qobyzdyń túpki qyzmeti baqsylyq dástúrmen tyǵyz bailanysty bolyp, sol zamannan jetken áýendik saryndar saqtalǵan. Osy saryndardyń negizinde dástúrli kúiler oryndalyp, sonymen qatar ánge súiemeldenip, jyr-termeler aitylǵan. Búginde qobyz zamanaýi talaptarǵa sai akademiialyq baǵytta damýda. Iaǵni, Antonio Vivaldi, Volfgang Amadei Motsart, Iozef Gaidn, Iogan Sebastian Bah syndy álemdik kompozitorlardyń shyǵarmalaryn oryndaýǵa múmkindik berip otyr. Sonymen birge estradalyq baǵytta da qobyzdyń áleýeti zor, aspap arqyly jeńil kaverlik týyndylardy oryndap, keń aýditoriiaǵa nasihattaýǵa bolady. «QOBYZ SOUL – DASTUR» kontserti túrki dúnietanymyna negizdelip, sol halyqtardyń mýzykalyq murasyn kórermenge usynýmen erekshelendi. Kontsert barysynda túrki elderine tán qobyz oryndaý tehnikasy men ádis-tásilderi de kórsetildi", – dedi Mádeniet salasynyń úzdigi Maqsat Medeýbek.
Qobyzdyń qylynan tógilgen árbir saz – ótken men búgindi sabaqtastyryp turǵan rýhani altyn kópir ispetti. Bul kesh – ulttyq ónerge degen taǵzymnyń, ata-baba murasyna degen qurmet pen izettiń kórinisi.
Mýzykalyq kesh – ǵasyrlar tereńinen jetken syrly sarynǵa, qobyz únine arnalǵan rýhani saiahat. Qobyz – tek qazaq halqynyń ǵana emes, sondai-aq qaraqalpaq, ózbek, tatar jáne qyrǵyz halyqtarynyń mádeni murasynda da erekshe oryn alatyn kóne mýzykalyq aspap. Onyń qońyr úni men jan terbeter muńdy úni túrki halyqtarynyń ortaq tarihy men taǵdyrynan syr shertedi.
