Elordada osy kóktemde kórý qabileti nashar balalarǵa arnalǵan mamandandyrylǵan balabaqsha ashylady. 90 orynǵa eseptelgen mekeme Saryarqa aýdanynda ornalasqan (Kenesary kóshesi, 9/1), dep habarlaidy "Ult aqparat".
Qala ákimi Altai Kólginovtiń jazýynsha, sonymen birge biyl erekshe qajettiligi bar azamattar úshin birqatar ońaltý ortalyǵy iske qosylady.
«Múmkindigi shekteýli turǵyndardy ońaltý úshin júieli negizde jaǵdai jasaý mańyzdy. Máselen, ótken jyly ǵana balalardyń tserebraldy sal aýrýy (BTsSA), aýtizm, Daýn sindromy jáne taǵy basqa diagnozy bar balalardy ońaltýmen ainalysatyn birqatar iri ońaltý ortalyǵy ashyldy. Máselen, «Asyl Miras« aýtizm ortalyǵy (Ýálihanov kóshesi) arqyly aýtistik spektrdi 50% kóbirek qamtydyq. Bul joba Bolat Ótemuratov qorymen birlese júzege asyryldy. Sol úide ornalasqan taǵy bir ońaltý ortalyǵy BTsSA, aýtizm diagnozy jáne basqa da birqatar aýrýlary bar balalarmen ainalysady», - dedi elorda basshysy.
Sondai-aq málim etilgendei, №1 qalalyq balalar aýrýhanasy bazasynda Tuńǵysh Prezident Qory men «Samuryq-Qazyna» qoldaýymen ótken jyldyń kúzinde «Qamqorlyq» ońaltý ortalyǵy ashyldy. Bul BTsSA diagnozy bar 600-ge jýyq balany jyl saiyn qosymsha tegin meditsinalyq kómekpen qamtýǵa múmkindik bergen.
«Qala aýdandarynda «úi janyndaǵy dáriger» atty 29 nysan ashyldy. Ippodrom bazasynda balalar ippoterapiiamen ainalysa alatyn jabyq manejdiń qurylysyn júrgizip jatyrmyz. «Jastar« saraiynda erekshe qajettiligi bar adamdar úshin qoljetimdi bassein bolady. Invataksi sany 2 esege artady.
Jańa úilerdiń birinshi qabattarynda «qadamdyq qoljetimdilik« qaǵidatyna sai balalarǵa arnalǵan shaǵyn ortalyqtar, ońaltý ortalyqtary, balabaqshalar, úidiń janyndaǵy dáriger jáne ózge de nysandardy ashamyz.
Ulttyq qoǵamdyq senim keńesiniń V otyrysynda Prezident erekshe qajettiligi bar balalardyń sany ósip kele jatqanyn, olarǵa jan-jaqty keshendi ońaltý qajet ekenin, «alǵashqy meditsinalyq-sanitarlyq kómek uiymdary janyndaǵy áleýmettik qyzmetterdiń jumysyn kúsheitý qajet» ekenin atap ótti.
Erekshe qajettiligi bar azamattardy ońaltý úshin jaǵdai jasaý boiynsha jumysty júieli negizde jalǵastyramyz», - dep jazdy Altai Kólginov Instagram-da.
