Búgin Astanada "Maiskii" saiajai massivinde turatyn adamdardyń jer úiin súrmek. Turǵyndar - apaly-sińlili Raýshan jáne Nesipkúl Uiabaevalar úiiniń syrtyna Qazaqstan prezidenti Nursultan Nazarbaevtyń sýretterin japsyryp tastaǵan. Bul týraly Azattyq saity jazdy.
Nesipkúldiń Azattyqqa aitýynsha, sáýirdiń ortasynda Qazaqstan prezidenti Nursultan Nazarbaev EKSPO-2017 kórmesi qarsańynda "qala kórkin buzatyn eski úilerdiń" áli de qalǵanyna ashýlanyp, synaǵan soń jergilikti bilik ókilderi úilerin bosatýdy talap etip jii kele bastaǵan.
- 50 sharshy metr bolatyn úiimizdi 2007 jyly saldyq. Baýyrlarym bar, barlyǵy jeti adam turyp jatyrmyz. Jer telimimizdi memleket muqtajdyǵyna qajet" degen sebeppen alý úshin 2014 jyldan bastap úidi bosatýdy talap ete bastady. Sol jyly ótemaqy retinde 400 dollar usynǵan. Al biyl 4 million 700 myń teńge usyndy. Mundai aqshaǵa páter satyp ala almaimyz. Sheneýnikter tym bolmasa prezidentten qorqatyn shyǵar degen oimen prezidenttiń sýretin japsyryp qoidyq, - deidi Nesipkúl Uiabaeva.
Ol saiajai massivindegi úilerdi súrý týraly sot sheshimin Esil aýdandyq soty 2014 jyly ózderiniń syrtynan shyǵarǵanyn, biraq ol sheshim qolyna timegenin aitady.
"Maiskii" saiajai massivi qazir qorshalyp tur. Mundaǵy úilerdiń kópshiligi buǵan deiin súrilgen, keibiri bos tur. Resmi málimet boiynsha, bosaǵan aýmaqqa áleýmettik nysan salynbaq.
Qazaqstan konstitýtsiiasyna engizilgen ózgeris boiynsha, tuńǵysh prezident Nursultan Nazarbaevtyń sýretin búldirýge, jyrtýǵa tyiym salynǵan.
2015 jyly Astana biligi Azattyqqa bergen jaýabynda "Maiskii" saiajailar seriktestiginiń ornyna "QazMunaiGaz" ulttyq kompaniiasy qyzmetkerleriniń balalaryna arnalǵan balabaqsha salý josparlanǵanyn aitqan.
2016 jyly 19 sáýir kúni "Maiskii" saiajailar seriktestiginde turatyn astanalyq Janar Temirǵalieva da úiinen shyǵarylǵan.
