Astanada politsiia qyzmetkerleri meshitten uialy telefon urlady degen kúdikpen 25 jastaǵy er adamdy ustady, dep habarlaidy ult.kz.
Qalalyq politsiia departamentiniń baspasóz qyzmetiniń málimetinshe, oqiǵa tańǵy ýaqytta bolǵan. Namazǵa kelgen azamat qulshylyǵyn aiaqtaǵan soń demalý úshin telefonyn janyna qoiyp, qýattaýǵa qosyp ketken. Osy sátti paidalanǵan kúdikti ainaladaǵylardyń nazarynan tys qalǵan qurylǵyny jasyryn alyp, oqiǵa ornynan ketip qalǵan.
Jedel-izdestirý sharalary barysynda politsiia qyzmetkerleri beinebaqylaý kameralarynyń jazbalaryn zerdelep, sol kúni kúdiktiniń jeke basyn anyqtap, ony ustaǵan.
Urlanǵan telefon tárkilenip, zańdy iesine qaitaryldy. Atalǵan derek boiynsha qylmystyq is qozǵalyp, sotqa deiingi tergeý amaldary júrgizilip jatyr.
Aita keteiik, buǵan deiin de elordadaǵy meshitterdiń birinde namaz oqyp turǵan azamattyń telefonyn urlaǵan kúdikti politsiianyń qolyna túsken bolatyn.
