Nur-Sultan qalasy ákimdiginiń janynda ómirlik qiyn jaǵdaiǵa tap bolǵan balalardy qoldaý ortalyǵynda 68 bala tirkelgen. Onyń 60% – qyz balalar. Bul týraly Nur-Sultan qalasy máslihatynyń kezekti sessiiasynda aityldy, dep habarlaidy QazAqparat.
«Búgingi tańda búkil álem ekonomikalyq daǵdarysty bastan keshirýde. Árine, Nur-Sultan qalasy budan shet qala almaidy. Halyqtyń áleýmettik máseleleri qanshalyqty kúrdeli bolsa, sol máselelerdiń bir ushy mindetti túrde jetim balalar men ata-ana qamqorlyǵynsyz qalǵan balalarǵa kelip tiedi. Máselen, Nur-Sultan qalasy ákimdiginiń janynda ómirlik qiyn jaǵdaiǵa tap bolǵan balalardy qoldaý ortalyǵy bar. Ótken jyldyń málimeti boiynsha, sol ortalyqqa 35 bala tirkelse, biyl 3 aidyń ishinde sol balalardyń sany 68-ge jetip otyr», - deidi Nur-Sultan qalasy máslihatynyń depýtaty Lázzat Razbekova-Tileýhanova.
Onyń aitýynsha, ómirlik qiyn jaǵdaiǵa tap bolǵan 68 balanyń 60% – qyzdar.
«Bul – júrekti aýyrtatyn másele. Osyǵan orai bilim basqarmasyna 12-18 jas aralyǵyndaǵy qyzdarǵa arnalǵan arnaiy ortalyq ashýdy jáne osy máseleni sheshýge qatysty usynystar daiyndaýdy tapsyrý qajet dep sanaimyn», - deidi ol.
