Astana bilim salasynda investitsiialyq jobaǵa qol qoiylǵan elimizdegi alǵashqy qala boldy. Biznesmender jobany 100% qarjylandyrýǵa qamtamasyz etedi, al qalalyq bilik qurylys salý úshin jer ýchaskesin zattai grant túrinde usynady, dep habarlaidy "Ult aqparat" Astana qalasy ákimdiginiń baspasóz qyzmetine silteme jasap.
Búgin ákimdikte qala ákimi Baqyt Sultanov, Bilim jáne ǵylym ministri Kúlásh Shamshidinova jáne BAÁ Qazaqstandaǵy Tótenshe jáne ókiletti elshisi Mohammad Ahmad Aldjaberanyń qatysýymen bilim berý salasyndaǵy jobalardy damytý máseleleri boiynsha dóńgelek ústel ótti. Is-sharaǵa Syrtqy ister ministrliginiń investitsiialar jónindegi komitetiniń, Astana qalasy ákimdiginiń, ««ASTANA INVEST QIDO»JShS, qazaqstandyq jáne sheteldik kompaniialardyń ókilderi qatysty. Is-shara aiasynda SABIS halyqaralyq mektebin salýǵa qol jetkizildi. Bilim salasyndaǵy bul investitsiia aiasynda 1 myń oryndyq mektep pen 250 orynǵa arnalǵan mektepke deiingi bilim oshaǵy ashylady.
SABIS halyqaralyq mektepter jelisi álem boiynsha 20 elde bar. Jańa halyqaralyq mekteptiń qurylysy qaladaǵy mektepter júktemesin azaityp, jańadan 200 jumys ornynyń ashylýyna múmkindik bermek.
«Qalanyń qarqyndy ósip jatqanyn eskersek, jańa oqý oryndaryn ashý óte mańyzdy. Biz aldaǵy bes jylda 120 myń oqý ornyn ashýdy josparlap otyrmyz. Bul - qazirgiden eki ese artyq kórsetkish. Sonyń ishinde sheteldik jáne elimizdiń investorlary esebinen 20 myń oryndyq jekemenshik mektep ashýdy josparlap otyrmyz. Jeke investorlardyń esebinen osyndai jobalardyń júzege asatynyna biz qýanyshtymyz», - dedi Baqyt Sultanov.
Ákim aityp ótkendei, bilim sapasyn kóterý maqsatynda Elbasynyń bastamasymen keibir aimaqtarda sonyń ishinde, Astanada jan basyna shaqqandaǵy qarjylandyrýdy engizý arqyly mektepterdi damytý jóninde qosymsha sharalar júzege asyryldy. Jan basyna shaqqandaǵy qarjylandyrý júiesinde bilim berý salasyna jeke biznesti tartýǵa múmkindik qarastyrylǵan.
«Bul - Astana men SABIS úshin tarihi sát. Biz Astanaǵa ózimizdiń 130 jyldyq tájiribemizben jáne sizderdiń «2050» strategiialaryńyzdyń bir bólshegi bolyp kelemiz», - dedi «SABIS Group» vitse-prezidenti Viktor Saad.
Sondai-aq, dóńgelek ústel aiasynda otandyq bes investormen Astanada 17,4 mlrd teńgeden astam investitsiia kóleminde jańa jekemenshik mektepter qurylysy boiynsha kelisim jasaldy.
Aita keteiik, Astana - Qazaqstanda balalardy mektepke deiingi bilimmen qamtý maqsatynda jekemenshik balabaqsha salý boiynsha memlekettik tapsyrysty engizgen alǵashqy qala. Elorda ákimdigi bilim berý salasyn ári qarai damytýdy josparlap otyr. Bul sharalar jeke investitsiia tartý arqyly júzege asyrylmaq. Astana qalasy ákiminiń orynbasary Malika Bekturovanyń aitýynsha, SABIS mektep qurylysynyń birinshi kezeńin qarjylandyrýdyń ózi 15,5 million dollardy quryp otyr.
«Bul - júz paiyz jeke investitsiia. Bizdiń taraptan qurylys salý úshin jer ýchaskesi zattai grant túrinde usynyldy, iaǵni investitsiialyq kelisimshart aiasynda tegin. Bul - elimiz boiynsha bilim salasynda mektep salýǵa arnalǵan zattai grant usynylǵan alǵashqy kelisimshart. Qurylys osy jyly bastalyp, 2022 jyly tolyq aiaqtalady», - dedi Malika Bekturova.
Búgin qol qoiylǵan qujattar negizinde salynatyn ózge de jekemenshik mektepter 100% jeke investorlar esebinen júzege asyrylatyn joba bolyp tabylady. Malika Bekturovanyń aitýynsha, jekemenshik mektepter jan basyna shaqqandaǵy qarjylandyrý júiesi arqyly jartylai nemese tolyǵymen memlekettik tapsyryspen jumys jasaýy múmkin.
«Mektepke kelgen ár oqýshy avtomatty túrde memleket tarapynan qarjylandyrylady. Qazir salynyp jatqan jekemenshik mektepter osy júiege qyzyǵýshylyq tanytatyny sózsiz. Kei mektepter jartylai aqyly, al keibiri tolyǵymen tegin bolady. Ol mekteptiń bilim sapasyna jáne salynǵan qarjyny qaitarýdyń jolyna bailanysty. Biz aqyly mektepterge de jáne memlekettik tapsyryspen jumys jasaǵysy keletin mektepterge de múmkindik beremiz. Qazir eki mektepke de suranys bar», - dedi M. Bekturova.
