Foto: primeminister.kz
Elordany damytý máseleleri jónindegi keńeste Prezident Qasym-Jomart Toqaev Astanadaǵy internet sapasyn synǵa ala kele, ministr Baǵdat Mýsinnen máseleni qalai jáne qashan sheshetinin surady, dep habarlaidy QazAqparat.
«Biz esep júrgizip, nátijesinde internet jyldamdyǵy nashar 67 oryndy anyqtadyq. Ol jerlerdiń turǵyndarymen de kezdestik. Onda úiiniń tóbesine stansa ornatýdan qorqatyn radiofobtar turady. Ákimdik 60 turǵyn úi boiynsha túsindirý jumysyn júrgizýge kómek kórsetti. Qazirgi tańda osynyń ishinde 33 úi shatyryna bazalyq stansa ornatýǵa kelisti. Nátijesinde onyń besýine qajetti qurylǵy ornatyldy, altaýyna ornatylyp jatyr. Qalǵany boiynsha kelisimshart daiyndalý ústinde. 28 úi boiynsha 3 ai boiy jumys istep kelemiz, olar kelisim bermei otyr. Turǵyndarǵa stansanyń densaýlyqqa eshqandai ziiany joq ekenin túsindire almai kelemiz», - dedi Mýsin.
Onyń aitýynsha, zań talabyna sai eger turǵyn úiiniń tóbesine bazalyq stansa ornatýǵa qarsylyq bildirse, onda qurylǵy alynyp tastalady.
Ministr keltirgen málimet boiynsha jylyna osyndai 150 stantsiia alynady.
«Osy máseleden keiin zańǵa ózgertý engizýdi josparlap otyrmyz. Oǵan sai turǵyndardyń 50 paiyzy stansa ornatýǵa qarsy bolsa ǵana ony alyp tastaimyz. Al ekinshi másele – tarifterdiń tómendigi. Qoldanýshylar internette kóp otyrady, tiisinshe ol júiege kóp salmaq túsiredi. Máselen, sheteldikter qandai da bir materialdy ashpas buryn «Bul men úshin paidaly ma, joq pa?» dep oilanady. Óitkeni, ony qarasa, kóp megabaity ketedi», - dep túsindirdi Baǵdat Mýsin.
Ministrden keiin atalǵan saýalǵa jaýap bergen elorda ákimi Jeńis Qasymbek internet sapasyna qatysty másele qazan aiyna deiin 60-70% sheshiledi dep sendirdi.
«Negizinen osyndai oryndardaǵy turǵyndardyń 90 paiyzy kelisimin beredi. Tek 3-5 adamnyń qarsylyǵy qolbailaý bolyp otyr. Tiisinshe stantsiia ornatýǵa ruqsat berýge nietti adamdar osyndai turǵyndardyń kesirinen bul máselege tap bolyp jatyr», - dep málim etti shahar basshysy.
