Búgin «EKSPO» kórmesi aýmaǵynda elimizdiń bas shyrshasynyń shamdaryn jaǵý saltanatty sharasy ótti, dep habarlaidy "Ult aqparat".
Bas shyrsha «Nur Álemniń» janynda ornalasty. Jańa jyldyq shyrshanyń shamdaryn jaǵý rásimine Astana ákimi Áset Isekeshev qatysty. Shara barysynda merekelik baǵdarlamadan bólek, «EKSPO» kórmesi aýmaǵyna jinalǵan jurtshylyq otshashý tamashalady.
Astana qalasynyń mádeniet, muraǵattar jáne qujattama basqarmasy basshysynyń orynbasary Narima Muhambetalinanyń sózine qaraǵanda, bas shyrsha ornalasatyn jerdi tańdaý simvoldyq mánge ie bolyp otyr.
«Bul dástúrli shara bolǵandyqtan, biz jyl saiyn elimizdiń bas shyrshasynyń shamdaryn saltanatty túrde jaǵamyz. Shyrshanyń osy jerde ornatylýy kezdeisoq emes, ári simvoldyq mánge ie. Sebebi jaqynda ǵan osy aýmaqta «EKSPO» kórmesi ótti. Ózderińiz baiqaǵandai, bul alań el turǵyndary úshin mańyzdy bolyp otyr, sondyqtan elmizdiń bas shyrshasynyń shamdaryn «EKSPO» aýmaǵynda jaǵý sheshimi jasaldy», - dep atap ótti ol.
Atalǵan basqarmanyń málimetine qaraǵanda, elimizdiń basty Jańa jyldyq shyrshasy 200 myń jarqyldaǵan shammen jáne 6000 sharmen bezendirilgen, budan basqa jarqyldaǵan ilmekter men ádemi jyltyraqtar, qar búrshikteri ilingen. Shyrshanyń biiktigi - 25 metr.
Sonymen qatar, EKSPO-2017 aýmaǵynda ornalasqan eń iri muz qalashyǵy da ashyldy.
Budan buryn habarlanǵandai, saltanatty sharany tamashalaýǵa kelgen jurtshylyq úshin «I'm a Singer Kazakhstan» jobasy finalisteriniń jandy daýystaǵy ánderi shyrqaldy. Qonaq retinde Ringo toby ónerin kórsetti.
Esterińizge sala keteiik, Áset Isekeshov óziniń Facebook-tegi paraqshasynda elorda turǵyndary men qonaqtaryn elimizdiń bas shyrshasynyń shamdaryn jaǵýǵa shaqyrǵan bolatyn.
Al buǵan deiin Áset Isekeshov jańa jylǵa daiyndyq Táýelsizdik kúninen soń bastalatyndyǵyn aitqan edi.
Jańa jyldy merekeleý maqsatynda shaharda 25 jańa jyldyq shyrsha, 12 hokkei alańy, 15 muz aidyny, 10 muz tómpeshigi, 2 muz qalashyǵy («Astana EHPO-2017» Ulttyq kompaniiasy» AQ aýmaǵynda jáne Astana qalalyq ákimdigi ǵimaraty aldyndaǵy alańda) boi kóteredi.
