Nur-Sultan qalasyndaǵy birqatar bilim berý oshaǵyna elimizge keńinen tanymal tulǵalardyń esimin berý máselesi qalalyq máslihattyń otyrysynda qaraldy, dep habarlaidy QazAqparat.
«Biyl 28 sáýirde qalalyq onomastika komissiiasynyń kezekti otyrysy ótti. Sol jerde elordanyń birqatar bilim mekemesine ataý berý máselesi talqylandy. Atap aitqanda №1 qalalyq mektep litseige Keńes Odaǵynyń eki márte batyry Talǵat Bigeldinovtiń esimin berý, №70 mektep litseige kórnekti memleket jáne qoǵam qairatkeri Temirbek Júrgenovtiń esimin berý, №92 mektep litseige geologiia-minerologiia ǵylymynyń doktory, professor, Qazaqstan ǵylym akademiiasynyń alǵashqy quryltaishylarynyń biri Aqjan Ál-Mashanidiń esimin berý, №65 mektep gimnaziiaǵa aqyn, jazýshy Maǵjan Jumabaevtyń esimin berý, №88 mektep litseige belgili aqyn Qadyr Myrza Áliniń esimin berýdi jáne №1 óner mektebine belgili kúishi Táttimbet Qazanǵapulynyń esimin berýdi sizderdiń nazaryńyzǵa usynyp otyrmyz», - dedi Nur-Sultan qalasy tilderdi damytý jáne arhiv isi basqarmasynyń basshysy Sáken Esirkep máslihat otyrysynda jasaǵan baiandamasynda.
Sondai-aq, basqarma basshysy qalalyq máslihat depýtattarynan atalǵan usynysty qoldaýyn surady.
«Bul joba Qazaqstan Respýblikasynyń qoldanystaǵy zańnamalaryna qaishy kelmeidi. Sol siiaqty normativtik-quqyqtyq aktilerge qoiylatyn talaptardy buzbaidy», - deidi ol.
