Elordadaǵy «Dáýlet» sport kesheninde Nomad MMA stilinde VIII Halyqaralyq «Aziia jaýyngeri» týrniri ótip jatyr, dep habarlaidy QazAqparat.
Aziianyń myqtysy ataǵy úshin 500-ge jýyq sportshy ózara baq synaýda. Olardyń ishinde Qazaqstan, Pákistan, Iran, Úndistan, Bangladesh, Ózbekstan, Ázerbaijan, Qyrǵyzstan, Aýǵanstan jáne Resei elderiniń ókilderi bar.
«MMA sport túri álemniń kóptegen elderinde erteden qolǵa alynyp, kósh ilgeri damyǵan. Osy turǵyda biz MMA-nyń ózindik ádisin oilap shyǵarý jolynda biraz eńbektendik. Birqatar elderge baryp, atalǵan sport túriniń deńgeii men jetistikterin qarastyrdyq. Atqarylǵan biraz jumystyń arqasynda «Nomad MMA» kóshpeli halyqtardyń kúresin jasap shyǵardyq. Bizdiń bastapqy maqsatymyz - jas urpaqty MMA arqyly sportqa baýlý. Elimizde MMA boiynsha orta býyn ókilderinen kásibi sportshy joqtyń qasy. Osy olqylyqty joiý úshin biz jasóspirimderdi kóptep tartyp jatyrmyz. Jarysqa qatysyp, júldeli oryn almasa da, jetkinshek ózi úshin, ózin qorǵaý úshin ainalyssa, ol da biz úshin jetistik. Elimizde bul sport endi ǵana jandanyp, qoldaýǵa ie bola bastady. Ózderińiz kórip otyrǵandai, osymen 8-shi ret uiymdastyrylyp otyrǵan týrnirge 500-ge jýyq sportshy qatysýda», - dedi «Nomad MMA» respýblikalyq federatsiiasynyń prezidenti Gadji Gadjiev.
Federatsiia prezidentiniń aitýynsha, Nomad MMA jekpe-jegin damytýdaǵy taǵy bir maqsat - chempiondar jasap shyǵarý ǵana emes, atalǵan sporttyń buqaralyq sipatqa ie bolýy.
Eki kúnge sozylatyn sport básekesinde úzdik dep tanylǵandar halyqaralyq chempiontqa joldama alady.
Týrnirdi Nomad MMA halyqaralyq federatsiiasy ótkizip jatyr. Qoldaýshylar -QR Mádeniet jáne cport ministrligi men Astana qalasynyń ákimdigi.
Aita keteiik, búginde atalǵan jekpe-jek túrimen federatsiia aiasynda 14 myń bala ainalysyp júr.
Sonymen qatar, 15 jyldyq tarihy bar Nomad MMA halyqaralyq federatsiiasynyń quramynda 15 memleket ókilderi bar.
