Astanada avtosalon menedjeri eki avtokólikti aldaý jolymen iemdenip, ielerine 23 million teńge shyǵyn keltirgeni úshin sottaldy, dep habarlaidy ult.kz.
24.kz jazýynsha, sot materialdaryna sáikes, Changan CS55 Plus pen Toyota Camry kólikteriniń ieleri olardy satý úshin avtosalonǵa tapsyrǵan. Menedjer kólikterge satyp alýshy tabylǵanyn aityp, satýdan túsken qarajat birneshe kún ishinde aýdarylatynyna sendirgen. Osylaisha ol kólik ielerin avtokólikterdi úshinshi tulǵanyń atyna qaita rásimdeýge kóndirgen.
Qujattar rásimdelgennen keiin sottalýshy kólikterden túsken 23 million teńgeni óz qajetine jumsap jibergen. Sonyń saldarynan jábirlenýshilerge iri kólemde materialdyq shyǵyn keltirilgen.
Sot barysynda memlekettik aiyptaýshy onyń kinásin tolyq dáleldeitin aiǵaqtardy usyndy. Sottalýshy óz kinásin tolyq moiyndap, jasaǵan áreketine ókinetinin aitty.
Sot er adamdy kináli dep tanyp, ony 3 jyl 4 aiǵa bas bostandyǵynan aiyrdy. Sonymen qatar jábirlenýshilerdiń keltirilgen shyǵyndy óndirý týraly azamattyq talap-aryzy tolyq qanaǵattandyryldy. Úkim zańdy kúshine endi.
Prokýratýra menshikke qarsy qylmystar úshin múlki tárkilenip, jeti jylǵa deiin bas bostandyǵynan aiyrý jazasy kózdelgenin eske salyp, azamattardy zań talaptaryn saqtaýǵa shaqyrdy.
