Astanada internet-alaiaqtardyń qylmystyq shemasyna qatysy bar degen kúdikpen 19 jáne 21 jastaǵy eki turǵyn ustaldy. Tergeý málimetinshe, olar aqshalai syiaqy úshin ózderiniń banktik esepshottaryn, uialy telefondaryn, SIM-kartalaryn, sondai-aq bank qosymshalary men kriptovaliýta birjalaryndaǵy akkaýnttaryn alaiaqtardyń paidalanýyna berge, dep habarlaidy ult.kz.
Politsiianyń málimetinshe, atalǵan quraldar keiin azamattardy aldaý maqsatyndaǵy qylmystyq shemada qoldanylǵan.
Jábirlenýshilerdiń biri – 78 jastaǵy elorda turǵyny. Oǵan ózin memlekettik organ men bank qyzmetkeri retinde tanystyrǵan alaiaqtar habarlasyp, jinaq aqshasyn «qaýipsiz shotqa» aýdarý qajet ekenine sendirgen. Budan bólek, olar zeinetkerdi altyn áshekeilerin satyp, odan túsken qarjyny da ózderi kórsetken esepshottarǵa jiberýge kóndirgen.
Jedel-izdestirý sharalary barysynda tártip saqshylary jábirlenýshiniń aqshasy túsken banktik shottardyń ielerin anyqtap, eki kúdiktini qolǵa túsirdi.
Tergeý barysynda olardyń biriniń esepshotyna qylmystyq jolmen alynǵan 1 million teńge, al ekinshisiniń shotyna 2,5 million teńge aýdarylǵany belgili boldy.
Atalǵan fakti boiynsha dropperlikke qatysty qylmystyq ister qozǵalyp, sotqa deiingi tergep-tekserý júrgizilip jatyr.
Politsiia azamattardy jeke banktik kartalarynyń derekterin, SMS arqyly keletin rastaý kodtaryn, mobildi bank qosymshalarynyń logini men qupiiasózin bógde adamdarǵa bermeýge shaqyrdy. Vedomstvonyń eskertýinshe, óz esepshotyn nemese jeke derekterin úshinshi tulǵalarǵa paidalanýǵa berý azamatty qylmysqa sybailas qatysýshy retinde qylmystyq jaýapkershilikke ákelýi múmkin.
