Elordada «Itrade Consalting Group» JShS direktorynyń ústinen 90 adamnan aryz tústi, dep habarlaidy "Ult aqparat".
Nur-Sultan qalalyq Politsiia departamenti baspasóz qyzmetiniń málimetinshe, «Itrade Consalting Group» JShS direktory astanalyq turǵyndardyń senimine kirý arqyly aqshalaryn iemdenip otyrǵan.
«Kúdikti 47 jastaǵy Qaraǵandy oblysynyń turǵyny ekeni belgili boldy. Ieliginde Almaty jáne ózge de qalalarda qarjylyq saýattylyqty úiretetin firmalar jelisi bar. Qalalardy aralap, sonyń ishinde Nur-Sultanǵa da kelip, seminarlar ótkizgen. Sol kezde kelýshilerdi birjadaǵy aktivterge qarajat salyp, eselep kóbeitýge bolatyny týraly nasihat júrgizgen. Onyń esebinshe, salymshylar birjaǵa salǵan qarjydan 140, 190 paiyzǵa deiin tabys alýy kerek bolǵan. Aryzdanýshylardyń ishinde 100 dollardan 150 000 dollarǵa deiin aqsha salǵandar bar», - dedi Politsiia departamentiniń baspasóz qyzmetinen.
Salǵan investitsiialary kútken tabysty ákelmegenin túsingen salymshylar aqyry politsiiaǵa júgingen. Asa iri kólemde alaiaqtyq jasady degen kúdikke ilingen áiel qazir Almatydaǵy tergeý izoliatorynda otyr.
«Onyń áreketterinen zardap shekken azamattardyń sany naqtylanyp jatyr. «Itrade Consalting Group» JShS áreketinen zardap shekken bolsańyzdar, Nur-Sultan qalasynyń Politsiia dpartamentine 8-7172-71-63-35, 8-7172-71-62-85 nemese 102 telefony boiynsha habarlasyńyzdar» - dep jazylǵan vedomstvo taratqan málimette.
