Sybailas jemqorlyqqa qarsy qyzmet «Samuryq-Qazyna» Ulttyq ál-aýqat qorynyń sportty damytý jáne Qazaqstannyń bedelin kóterýge bólingen aqsha qarajatyn jymqyrý faktisi boiynsha qylmystyq isti tergep jatyr, dep habarlaidy "Ult aqparat".
«Astana» kásibi sport klýbynyń eks-direktory Amanbek Kúlshikov atalmysh klýbtyń quramyna kiretin jeke mekemeler - «Astana Pro Team» velokomandasynyń» basshysy Lázzat Shámshievamen jáne «Astana Motorsports» jetekshisi Artýr Ardavichýspen qylmystyq kelisim jasap, iske asyrǵan. 2016-2018 jyldar aralyǵynda Kúlshikov qasaqana shyǵyndar kóleminen birneshe ese artyq somaǵa qarjylandyrý týraly tapsyrystardy, sonymen qatar qarajattyń maqsatty jumsalǵany týraly Shámshieva jáne Ardavichýs usynǵan jalǵan esepti qabyldaǵan», - dedi búgin elordada ótken baspasóz máslihatynda Sybailas jemqorlyqqa qarsy is-qimyl agenttigi seriktestik departamentiniń bas sarapshysy Symbat Israpýlova.
Olar artyq bólingen qarajatty sheteldik kompaniialarmen jalǵan kelisimder jasasý, oqý-jattyqtyrý jiyndaryn uiymdastyrý, úi-jailardy jalǵa alý, taýarlyq-materialdyq qundylyqtardy satyp alý boiynsha jalǵan aktilerge qol qoiý jolymen jymqyrǵan.
«Mysaly demeýshiler jyl saiyn kásibi jarysqa qatysýdyń barlyq álemdik standarttaryna sai keletin 200-den astam brendtik velosipedti tegin usynady. Sondai-aq 2018 jyly qajettilik bolmasa da, Almaty qalasynda avtoshina satýmen ainalysatyn qazaqstandyq JShS-men, sondai 6 velosiped jáne oǵan qosalqy bólshekter satyp alýǵa 219 myń eýro somasyna jalǵan kelisimshart jasalǵan. Oǵan qosa, bul qymbat velosipedter shyn máninde sol boiy jetkizilmei, qarajat jymqyrylǵan. Mundai derekter az emes», - deidi ol.
Bólingen qarajat osylaisha olardyń otbasy músheleriniń jáne sportqa esh qatysy joq basqa da tulǵalardyń ishki jáne shetelge aviasaparlarynyń tólemine jumsalǵany da mysal bola alady. Bul shyǵyndar 100 mln teńgeden artyq somany quraidy.
«Búgingi tańda anyqtalǵan zalal somasy 2 mlrd teńgeden asady. Qazirgi ýaqytta Kúlshikov jáne Shámshieva Nur-Sultan qalasynyń tergeý izoliatorynda. Sot olarǵa qatysty 2 ai merzimge qamaýda ustaý bultartpaý sharasyn sanktsiialady. Ardavichýsqa, onyń ishinde Interpol jelisi boiynsha da halyqaralyq izdeý jariialandy. Oǵan qatysty da «qamaýda ustaý» bultartpaý sharasy sanktsiialandy», - deidi ol.
Is boiynsha kúdiktilerdiń Almaty jáne Nur-Sultan qalalaryndaǵy qymbat múlikteri, avtotransporttyq quraldar, elitalyq páterler, jer ýchaskeleri qosa anyqtalǵan. Iske basqa da adamdardyń qatystylyǵy tekserilýde.
