Elordalyq saýda oiyn-saýyq ortalyqtary men saýda úileri qalada tolyq lokdaýn engizbes úshin Ashyq jobasy aiasynda jumys isteýge daiyn, dep habarlaidy QazAqparat.
Epidemiologiialyq ahýalǵa bailanysty biznes sýbektileriniń jumysy Nur-Sultan qalasy kásipkerler palatasynyń, sanitarlyq-epidemiologiialyq baqylaý departamentiniń, elorda ákimdigi basshylyǵynyń, sondai-aq SOO jáne basqa ókilderiniń qatysýymen zoom-konferentsiiasynda talqylandy.
Nur-Sultan qalasy kásipkerler palatasynyń direktory Almat Júnisov buǵan deiin «Atamaken» QR UKP Ashyq qosymshasyn barlyq jerge engizý sekildi biznes jumysynyń birneshe nusqasyn Úkimetke usynǵanyn atap ótti.
Qazirgi ýaqytta SOO jáne SÚ atalmysh jobaǵa óz erkimen qatysady.
Óz kezeginde SOO jáne SÚ ieleri Ashyq aiasynda jumys algoritmin qamtamasyz etýge qyzyǵýshylyq tanytady.
«Biz SOO men SÚ koronavirýs infektsiiasynyń taralý qaýpi joǵary ári adam kóp jinalatyn oryn ekenin bilemiz. Osy sebepti saýda ǵimarattarynyń qaýipsiz jumys isteýi úshin, sol siiaqty qalanyń tynys-tirshiligin saqtaý úshin osy qyzmet túrin jobaǵa qosý qajet dep sanaimyz», - dedi Almat Júnisov.
Ol sondai-aq SOO jáne SÚ ielerine qosymshany tiisti deńgeide paidalanbaǵany, kelýshini tirkemegeni úshin jobadan eki apta merzimge, qaitalanǵan jaǵdaida eki aiǵa shyǵarylatynyn eskertti.
Ashyq jobasynan shyǵarý nysannyń jumys ýaqytyn edáýir qysqartady.
Óz kezeginde sanitarlyq-epidemiologiialyq baqylaý departamenti direktorynyń orynbasary Aigúl Shaǵaltaeva elordada sońǵy aptada koronavirýs infektsiiasyn kún saiyn 1200-1500 adam juqtyratynyn jetkizdi.
Sońǵy aptada 9934 COVID-19 oqiǵasy tirkeldi, bul aldyńǵy aptadan 37,5% joǵary. Ol KVI taralatyn negizgi oryndar - adam kóp jinalatyn mekemeler, ásirese SOO ekenin aityp ótti.
«Ashyq qosymshasynyń arqasynda kúnine 200-ge jýyq adam úi karantinin buzatyny anyqtalady. PTR testi oń nátije kórsetkenin bile otyryp, adam kóp jinalatyn jerge barýyn toqtatpai otyr. Bul juqtyrý qaýpi óte joǵary ekenin bildiredi. Qazir karantindi qatańdatý máselesi qaralýda. Biz ShOB sýbektileriniń jumys kestesi men rejimine qosymsha ózgerister engizýdi usynyp otyrmyz. Bárin sanitarlyq normalardy qatań saqtaýǵa shaqyramyn», – dedi Aigúl Shaǵaltaeva.
Kezdesýge qatysqan kásipkerler Ashyq jobasy sheńberindegi jumys algoritmin saqtaýǵa, SOO jáne basqa barlyq kirý/shyǵý tustarynda kelýshilerdi baqylaýdy qamtamasyz etýge daiyn ekenin jetkizdi.
