Qazaqstandyq Mihail Kýkýshkin Astana Open ATP 250 týrniriniń shirek finalyna shyqty, dep habarlaidy "Ult aqparat".
Dúniejúzilik reitingte 91-orynda turǵan M.Kýkýshkin ekinshi ainalymda álemniń 28-inshi, osy jarystyń 1-raketkasy, frantsiialyq Benýa Permen kúsh synasty.
Bul qarsylastardyń ózara alǵashqy kezdesýi edi.
Birinshi partiiany bastaǵan M.Kýkýshkin qarsylasynyń breik jasaýyna múmkindik berip qoidy. Degenmen set barysynda tarazy basyn teńestirdi – 4:4. Tai-breikte frantsiialyq tennisshi sátti oinady – 7:6 (7:4).
Ekinshi sette de Benýa Per breikpen alǵa ketti – 3:0. Qazaqstandyq tennisshi esepti qaita teńestirdi – 4:4. Sosyn tai-breikte esesin jibergen joq – 7:6 (7:2).
Úshinshi, sheshýshi partiiany Kýkýshkin óte qarqyndy ótkizdi – 6:1.
Tartysty báseke 2 saǵat 14 minýtqa sozyldy.
M.Kýkýshkin jartylai finalǵa shyǵý úshin álemniń 98-raketkasy, 21 jastaǵy finliandiialyq Emil Rýýsývýorimen talasady. Ol birinshi kezdesýinde qazaqstandyq Timofei Skatovty qinalmai (6:2, 6:0) jeńse, búgin álemniń 60-raketkasy, aýstraliialyq Djordan Tompsonnan 6:2, 3:6, 6:4 esebimen ailasyn asyrdy.
Jumaǵa belgilengen shirek finalda sondai-aq frantsiialyq Adrian Mannarino men amerikalyq Makkenzi Makdonald, Belarýs ókili Egor Gerasimov pen amerikalyq Frensis Tiafo, taǵy bir amerikalyq Tommi Pol men aýstraliialyq Djon Millman ózara sheberlik baiqasady.
Finaldyq match 1 qarasha kúni ótedi.
