Elorda mektepterinde pánderdiń 70% - dástúrli, 30% - qashyqtan oqytylady. Bul jaiynda elorda ákimdiginiń baspasóz ortalyǵynda ótken onlain brifingte aityldy, dep habarlaidy QazAqparat.
«Oqý jylynyń eń uzaq toqsany – III toqsan da aiaqtalýǵa jaqyn. Qazir III toqsannyń erekshelikterine toqtalyp óteiik. Ózderińizge belgili, 1 naýryzdan bastap 1-5 synyptardyń, sondai-aq halyqaralyq mektepterdiń 1-7 synyptarynyń bilim alýshylary úshin aralas formatta oqytý uiymdastyryldy. Qazirgi ýaqytta 1-5 synyp oqýshylarynyń 85 575-i, iaǵni 88% oflain rejimde oqyp júr. Al bitirýshi 9, 11, 12 synyptar oqýdy aralas formatta jalǵastyrady. Pánderdiń 70% - dástúrli, 30% - qashyqtan oqytylady», - deidi Nur-Sultan qalasy bilim basqarmasy basshysynyń orynbasary Rimma Imangazinova.
Onyń aitýynsha, bul rette barlyq sanitarlyq talaptar saqtalady.
«1,5 metr áleýmettik qashyqtyqty saqtai otyryp 25 baladan aspai, al halyqaralyq mektepterdiń 1-7 synyp oqýshylary úshin synypta 15 baladan aspai otyrǵyzylady. Sabaqtardyń ikemdi kestesin, aýysymdardyń kóbeiýin, sabaq arasyndaǵy úzilisterdi mektepterdiń qamqorshylyq keńesi kelisken. Sozylmaly arýlary bar, sondai-aq naýqaspen bailanysta bolǵan 3660 oqýshy ata-anasynyń ótinishi boiynsha onlain bilim alýda. 6, 7, 8, 10 synyp oqýshylary qashyqtan oqýdy jalǵastyryp jatyr. Barlyq mektepterde mektepke kireberiste dezinfektsiialyq týnnelder, qashyqtyq jaily belgiler ornatylǵan. Dezinfektsiialyq quraldar satyp alyndy, kvarttstalyp otyr», - deidi ol.
