Elorda ákimdiginiń burynǵy 4 laýazymdy qyzmetkeri Astana LRT isinde kúdikti dep tanyldy. Bul týraly búgin QR Sybailas jemqorlyqqa qarsy is-qimyl agenttigi 2-departamentiniń basshysy Sergei Perov aitty, dep habarlaidy QazAqparat.
«Tergeý júrip jatyr. Birqatar saraptama aiaqtalýǵa jaqyn, shyǵyn kólemi eselep ósti. Qazirgi ýaqytta 1 mlrd teńgeden asyp jyǵylady. Búgingi kúni bul is boiynsha 6 adam kúdikti dep tanylǵan. Onyń ishinde ákimdiktiń 4 laýazymdy tulǵasy bar. Tergeý qorytyndysy boiynsha brifing ótkizip, qoǵamǵa nátijesin jetkizetin bolamyz», - dedi ol agenttiktiń alqa otyrysy aiasynda BAQ ókilderine bergen suhbatynda.
S.Perov ákimdik qyzmetkerleriniń laýazymdary esimin ataýdan bas tartyp, olardyń buryn ákimdikte laýazymdy qyzmet atqarǵandyǵyn ǵana aitty.
«Sot-ekonomikalyq, sot-qurylys saraptamalary júrgizilip jatyr. Qurylys boiynsha oryndalǵan jumystardyń kólemin tekseremiz, ekonomikalyq saraptamalarmen keltirilgen shyǵyn somasyn esepteimiz. Tergeýge mundai ispen ainalysatyn jeke kompaniialar, Ulttyq bank sarapshylary jumyldyylǵan. Tekserý júrip jatyr», - dedi departament basshysy.
Onyń aitýynsha, qylmystyq is aqsha qarajattaryn urlaý faktisi boiynsha júrgizilip jatyr.
«Biz bir aidyń ishinde barlyq saraptamalardy aiaqtaýdy josparlap otyrmyz», - dedi S.Perov.
Sonymen qatar, Astana LRT-niń burynǵy basshysy Interpol arqyly izdeýde ekendigin atap ótti.
Eske salsaq, Prezident LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
«Sybailas jemqorlyqqa qarsy is-qimyl agenttigine tergeýdi jedeldeý tapsyrmasymen júgingim keledi. Bireýlerdiń shetelge qashyp ketkenin aityp, «jeńildiń astymen, aýyrdyń ústimen» júrýge bolmaidy. Bul josparlanǵan qashý ekeni túsinikti. Ózgelerdi, onyń ishinde sheshim qabyldaǵan ákimdiktiń basshylaryn qaperden tys qaldyrmaý kerek», - dedi Memleket basshysy.
Buǵan deiin LRT qurylysy ýaqytsha toqtaǵanyn habarlaǵan bolatynbyz.
