© Sputnik / Sergei Kim
Astana qalasynyń prokýratýrasy Qairat Boranbaev jáne onyń sybailastarymen kelisimge keldi, dep habarlaidy "Ult aqparat".
Vedomstvo málimetinshe, prokýratýra Q. Boranbaevpen jáne basqa sottalýshylarmen «QazTransGaz» AQ-nyń aqshalai qarajatyn iemdenip (QK 189-babynyń 4-bóligi) jáne olardy zańdastyrýǵa (QK 218-babynyń 3-bóligi) qatysty is boiynsha kináni moiyndaý týraly mámile nysanynda protsestik kelisim jasaǵan.
Zań boiynsha mundai kelisimdi jasaýdyń mindetti sharttary sottalýshylardyń erik bildirýi, olardyń taǵylǵan aiyppen kelisýi, dáleldemelerge daý keltirmeýi, zalaldy moiyndaýy jáne jábirlenýshiniń kelisimi bolyp tabylady.
"Osy oraida qala prokýratýrasy sottalýshylardyń kinálaryn tolyq moiyndaýyn jáne 14,5 mlrd. teńgeniń zalalyn ótegenin eskerip, jábirlenýshi taraptardyń kelisimimen protsestik kelisim jasaý týraly sheshim qabyldady.
Onyń sharttary boiynsha sottalýshylar jasaǵan qylmystaryn moiyndaǵandyqtan, Q. Boranbaev pen R. Nahanovtyń múlki tárkilenip, árqaisyna 6 jyl bas bostandyǵynan aiyrý jazasyn qoldansa, al T. Januzaqty 5 jyl bas bostandyǵynan aiyra otyryp, úsheýi de memlekettik qyzmette qyzmet atqarý quqyǵynan ómir boiyna aiyrý jazasynyń taǵaiyndalýymen kelisti.
Mundai jaza mólsheri Qylmystyq kodekstiń 55-babynyń 3-bóliginiń talaptaryna súienip aiqyndaldy. Oǵan sáikes is júrgizý kelisimi jasalǵan jaǵdaida jazanyń merzimi men mólsheri QK-niń erekshe bóliginiń tiisti babynda kózdelgennen joǵary merziminiń jartysynan aspaýy tiis" - delingen habarlamada.
Vedomstvo málimetinshe, QK-niń 189 jáne 218-baptary boiynsha eń joǵary jaza 12 jyldan aspaityny eskerile otyryp, sottalýshylarǵa tiisinshe 6 jáne 5 jyldan bas bostandyǵynan aiyrý jazasyn (eń joǵary merzimniń jartysynan aspaityn) taǵaiyndaý usynylǵan.
Protsestik kelisim qaraý jáne ony bekitý týraly sheshimdi qabyldaý úshin sotqa joldandy.
Esterińizge sala keteiik, osy jyldyń 22 tamyzynda apelliatsiialyq satydaǵy sotta isti qaraý barysynda sottalýshylar kinásin moiyndaý týraly mámile nysanyndaǵy protsestik kelisim jasasý týraly ótinishhat bergen bolatyn.
