«Nursultan Nazarbaev» Halyqaralyq áýejaiynyń ushyp-qoný jolaǵyn qardan tazartý jumystarynyń merzimi taǵy uzartyldy, dep habarlaidy "Ult aqparat".
«Aýa raiy jaǵdaiyna bailanysty Nursultan Nazarbaev áýejaiy qardan tazartý jumystaryna orai ushyp-qoný jolaǵy túngi saǵat 03.00-ge deiin jabyq bolatynyn habarlaidy. Jolaýshylardy áýejaidyń atqaryp jatqan jumystaryna túsinistikpen qaraýdy suraimyz. Jolaýshylarymyzdyń qaýipsizdigi úshin qoldan kelgenniń barlyǵy jasalýda. Tolyq aqparatty áýejailardyń jáne aviakompaniialardyń Call-ortalyqtarynda alýǵa bolady», - dedi «Nursultan Nazarbaev» Halyqaralyq áýejaiynyń baspasóz hatshysy Ánýar Shalekenov.
Sondai-aq ol «Frankfýrt – Nur-Sultan» reisi Almaty qalasynyń qosalqy aerodromyna jiberilgenin málim etti.
Eske salaiyq, búgin Nur-Sultan qalasynyń áýejaiy qar tazalaý jumystaryn júrgizý úshin aldymen, saǵat 16:30-20:00 aralyǵynda jabyldy. Keiinnen bul merzim saǵat 00.00-ge deiin uzartyldy.
Oryndalýy tiis bolǵan bir reis toqtatylyp, ekeýi basqa ailaqtarǵa jiberildi.
Búgin elordada qalyń qar jaýyp, boran soqty. Onyń ústine soltústik-batystan soqqan jeldiń jyldamdyǵy sekýndyna 9-14 metrge, oqtyn-oqtyn 15-20 metrge deiin jetedi.
Qaladan shyǵatyn barlyq baǵyttaǵy jol jabyldy.
