T.Q.Júrgenov atyndaǵy Qazaq ulttyq óner akademiiasyna jańa rektor taǵaiyndaldy, dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysynyń Ókimimen Ashat Maksimuly Maemirov T.Q.Júrgenov atyndaǵy Qazaq ulttyq óner akademiiasynyń rektory qyzmetine taǵaiyndaldy" delingen resmi habarlamada.
Ashat Maemirov - Qazaqstannyń eńbek sińirgen qairatkeri, filosofiia ǵylymdarynyń doktory (PhD), "Bolashaq" Prezident stipendiiasynyń iegeri. T. Júrgenov atyndaǵy Qazaq ulttyq óner akademiiasyn drama teatr rejisseri mamandyǵy boiynsha aiaqtaǵan. 2008 jyly Frantsiianyń tanymal Université Sorbonne Nouvelle Paris 3 ýniversitetinde bilim alyp, Drama óneriniń Parij ulttyq konservatoriiasynda taǵylymdamadan ótken bolatyn. 2010 jyly Resei teatr óner akademiiasynda (GITIS) teatr óneri magistri dárejesin qorǵady.
Eńbek jolyn Batys Qazaqstan oblystyq qazaq drama teatrynda rejisser bolyp bastady. Qurmanǵazy atyndaǵy Oral mýzykalyq kolledjinde "Akterlik óner" bóliminiń meńgerýshisi, T. Júrgenov atyndaǵy Qazaq ulttyq óner akademiiasynyń "Teatr óneri" fakýltetiniń dekany, Qazaq Ulttyq óner ýniversitetiniń "Akter sheberligi jáne rejissýra" kafedrasynyń dotsenti boldy. Shyǵarmashylyq jumystarynan bólek, ónertaný boiynsha filosofiia doktory retinde ǵylymi izdenýis jumystarynyń sheńberi - zamanaýi rejissýradaǵy dástúr men jańashyldyq úrdisteri, qazirgi zamanǵy teatr óneriniń damý tendentsiialary syndy taqyryptardy qamtidy.
Otandyq mádeniettiń qazirgi zamanǵy úzdik art-menedjerleri qataryna kiredi. Elimizdiń mádeniet pen óner salasyndaǵy belgili uiymdar - "Qazaqstannyń rýhani qory" AQ, "Qazaq áýenderi" AQ jetekshilik etti. 2017 jyly qazaqstandyq mádeniettiń kósh basyndaǵy eń iri mýzykalyq ujymdardyń biri - "Qazaqkontsert" memlekettik kontserttik uiymyn basqardy. Elordalyq "Astana miýzikl" teatrynyń kórkemdik jetekshisi jáne Qazaqstan teatrlar assotsiatsiiasynyń vitse-prezidenti bolyp tabylady.
Ashat Maemirovtyń shyǵarmashylyq qyzmeti teatr ónerimen bailanysty. Ol Ǵ.Músirepov atyndaǵy Qazaqtyń memlekettik akademiialyq balalar men jasóspirimder teatrynda "Qara shekpen" (G. Hýgaev), M.Áýezov atyndaǵy teatrda "Qoshtasqym kelmeidi" (A.Volodin), "Ulym saǵan aitam" (B.Bedelhan) atty spektaklderdiń, Abai atyndaǵy memlekettik akademiialyq opera jáne balet teatrynda S.Muhamedjanvtyń "Aisulý" operasy, "Astana Opera" teatrynda "Qyzjibek" operasyn sahnalaýǵa at salysty. Sonymen birge "Romeo men Djýletta" (J.Presgýrvik), "Qyz Jibek" (E.Brýsilovskii), "Astana" (B.Ǵafý, A.Orenbýrgskii) atty qazaqstandyq miýziklderdiń qoiýshy rejisseri retinde tanyldy.
Belgili qazaqstandyq rejisser Qazaqstannyń teatr ónerin birneshe ret halyqaralyq sahnalarda tanystyrdy. Avstriia, Belgiia, Germaniia, Izrail, Resei, AQSh, Túrkiia, Frantsiia, Armeniia, Grýziia, Polsha, Chehiia jáne t.b. memleketterde ótkizilgen teatr festivalderinde, simpoziýmdar men forýmdarǵa qatysty. 2009 jyly Qazaqstan sahna óneriniń tarihynda tuńǵysh ret Niý-Iork qalasynda ótken M.Chehov atyndaǵy I Halyqaralyq teatr festivalinde "Zooparktegi oqiǵa" spektaklimen (rej.A.Maemirov) laýreat atandy (AQSh). 2017 jyly onyń "Aqtastaǵy Ahiko" atty spektakli (rej.A.Maemirov) Tokio qalasynda (Japoniia) qoiyldy. Ótken jyldyń sońynda "Uly Dala teatry" atty eýropalyq týrne sheńberinde "Qyz Jibek" miýziklin (rej.A.Maemirov) álemniń bes astanasy - Briýssel, Parij, Vena, Berlin jáne Máskeý qalalarynyń kórermenderi erekshe yqylaspen qabyldady.
