Aldaǵy ýaqytta basylyp shyǵatyn mektep oqýlyqtary múldem jańa sapada bolady. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Oqýlyqtar máselesi óte mańyzdy. Bul - baiaǵydan kele jatqan, halyqtyń kókeiinde júrgen eń basty máseleniń biri. Bizde keibir áriptesterimiz «oqýlyq - qosymsha qural» dep aitady. Men onymen kelispeitindigimdi árqashan da aitamyn. Oqýlyq - bala úshin eń negizgi quraldyń biri. Bala oqýlyqqa súienip oqidy. Oqýlyqta bolǵan aqparatty boiyna sińiredi. Sondyqtan oqýlyqqa biz óte úlken nazar aýdaryp jatyrmyz. Biz oqýlyqtyń jalpy daiyndalý protsesin ózgerttik. Jalpy, avtorlardy alyp, bul solardyń ǵana problemasy desek, durys emes. Ne baspalardyń problemasy dep, baspaǵa aýdarsaq ta, durys bolmaidy. Qoǵamda sondai oi qalyptasqan. Biz ministrlik retinde jaýapkershilikti ózimizge alýymyz kerek. Óitkeni, jalpy osy saiasatty júrgizip otyrǵan ministrlik. Árine, bul jerde baspalardyń, avtorlardyń jibergen qatelikter bar. Biraq, negizinde osy saiasatty Bilim jáne ǵylym ministrligi júrgizip otyr. Sondyqtan biz osy saiasatty kúrt ózgerttik», - dedi ministr Ortalyq kommýnikatsiialar qyzmetindegi baspasóz máslihatynda BAQ ókilderiniń saýalyna orai.
Onyń aitynsha, kitap daiyndaý barysynda eń aldymen baǵdarlamalardyń durys bolýyna basa mán beriledi. Sodan keiin ǵana saraptama jasalyp baryp oqýlyqqa engiziletin bolady.
«Saraptamaǵa muǵalimdi 7 kúnge shaqyryp, qanshama kitapqa saraptama jasa degen kezde onyń esh tiimdiligi bolmaidy. Óitkeni, jaqsy muǵalim kitapqa saraptama jasaityn jaqsy maman degen sóz emes. Oqýlyqtaný degen bólek ǵylym. Onyń ózindik zańdylyqtary bar. Jalpy biyl biz oqýlyqtarǵa qatysty jańa ereje qabyldadyq. Endi budan keiin shyǵatyn oqýlyqtar basqa sapada jaryq kóredi», - dedi Ashat Aimaǵambetov.
