QR Bilim jáne ǵylym ministri Ashat Aimaǵambetovtiń ata-analarǵa jazǵan haty jariia boldy, dep habarlaidy "Ult aqparat".
«Qurmetti ata-analar! Balalarymyzdyń kóktemgi kanikýly 16 naýryzda bastaldy. Qazirgi kezde ata-analardyń basym bóligi úide jáne balalarǵa 21 kúnge sozylatyn demalysty qyzyqty ári paidaly ótkizýge kómektese alady. Meniń ulym – tórtinshi synyp oqýshysy. Ózi kitap oqyǵandy jaqsy kóredi. Mysaly, oqý jyly bastalǵaly «Robinzon Krýzo», «Tom Soierdiń bastan keshken oqiǵalary», «Meniń atym Qoja», «Kóshpendiler» trilogiiasy kitaptaryn birge oqyp shyqtyq. Súiikti kitabymyz – «Kapitan Granttyń balalary». Sondai-aq ejelgi grek jáne mysyr mifteri men ańyzdaryn qyzyǵa oqyp shyqtyq. Ata-analardyń balalardy kitap oqýǵa baýlyǵany óte mańyzdy. Eger bala Sizdiń kitap oqyp otyrǵanyńyzdy jii baiqaityn bolsa, ózi de qolyna kitap alatyn bolady», - dedi ministr hatynda.
Ol bala kezinde ǵylymi fantastika janrynda jazylǵan týyndylardy unatqanyn, Aizek Azimov, Rei Bredberi, aǵaiyndy Strýgatskiiler, Klifford Saimak jáne Robert Hainlainnyń eńbekteri qiialyn oiatqanyn atap ótedi.
«Osy avtorlardyń týyndylaryn oqyp, kúni boiy hikaialardyń mazmunyn oilap júrýshi edim. Osylaisha, eseie kele, ǵylymi ádebietterge degen qyzyǵýshylyǵym artty. Sondyqtan, balalardy osy janrǵa baýlý óte mańyzdy dep oilaimyn. Bala kúnde oqyǵan súiikti týyndylaryńyzdy balalaryńyzǵa usynyp kórińizder. Eń bastysy, bala úide kitapty neǵurlym kóp oqityn bolsa, mektep baǵdarlamasyn soǵurlym jeńil meńgeretinin umytpańyzdar», - dedi Ashat Aimaǵambetov.
Ministr óz hatynda kitap oqýdan bólek, otbasymen tanymdyq videolar qaraýǵa bolatynyn aitady.
«Mysaly, videosabaqtardy, treningter men ǵylymi tájiribelerdi, TED-konferentsiialaryn jáne basqalardy bizdiń ministrliktiń saitynan bilim berý resýrstarynyń tizimin taba alasyzdar. Aitpaqshy, qazirgi kezeńde bilim berýge baǵyttalǵan saittardy paidalaný barysynda trafik eseptelmeidi, iaǵni tegin bolady. Ol úshin biz internet provaiderlerimen kelisim ornattyq. Bul qosymsha bilim berý ortalyqtary, kýrstar men sektsiialar jumysyn toqtatqan kezeńde óte yńǵaily bolmaq. Sondai-aq, bul – balalardy onlain-formatta bilim alýǵa ikemdeýge jaqsy múmkindik, bolashaqta paidasy tietini de sózsiz», - dedi ol.
Bilim ministri ata-analardyń basym bóligi kanikýl aiaqtalǵan soń oqý protsesi qalai uiymdastyrylatynyn ýaiymdap júrgenin biletinin atap ótedi.
«Qazirgi ýaqytta oqýdy qashyqtan júrgizýge kómektesetin aqparattyq júielerdi daiyndap, testileýdemiz. Keibir sabaqtardy telearnalar arqyly ótkizýge bolady. Bul format bizdiń oqýshylar men ustazdar úshin úirenshikti emes, sondyqtan pedagogterdiń jumysyna túsinistikpen jáne qurmetpen qaraýlaryńyzdy suraimyn. Olar oqýshylaryn saǵyndy jáne mektepke keler sátin asyǵa kútýde. Bul – ministrdiń emes, jaǵdaiǵa bailanysty balalarymyzda kenetten paida bolǵan bos ýaqytty tiimdi ótkizýdi jáne osy kezeń bizdi balalarymyzben jaqyndastyra túsýdi qalaityn ákeniń usynystary ǵana. Balapandarymyzdyń baqytty bolýy biz ben Sizge tikelei bailanysty. Ózińiz ben jaqyndaryńyz aman bolǵai!», - dedi Ashat Aimaǵambetov.
