Rimde kúres túrlerinen halyqaralyq reitingtik týrnir óz máresine jetti. Jarystyń sońǵy kúninde erkin stildegi ásker balýandary kúmis jáne qola medaldi qanjyǵaǵa bailady, dep habarlaidy "Ult aqparat".
Aýqymdy týrnirge álemniń 32 elinen 350-den astam atlet qatysty. Onyń arasynda Olimpiada oiyndarynyń, álem jáne Eýropa chempionattarynyń jeńimpazdary men júldegerleri de bar.
Týrnir qorytyndysy boiynsha 70 kelige deiingi salmaq dárejesinde kúmis medaldi QR Qorǵanys ministrligi ortalyq sport klýbynyń sportshy-nusqaýshysy Dáýlet Niiazbekov jeńip aldy.
74 kelige deiingi salmaq dárejesinde OSK sport rotasynyń merzimdi qyzmettegi áskeri qyzmetshisi, qatardaǵy jaýynger Nurqoja Qaipanov qola júldeger atandy.
Atalǵan reitingtik týrnir birneshe jyl qatarymen Birikken kúres stilderi halyqaralyq federatsiiasynyń vitse-prezidenti bolǵan Matteo Pellikoneni eske alýǵa orai ótkiziledi.
Týrnirde olimpiada litsenziiasy oinatylmaidy, alaida sportshylardyń reitingisine áser etedi.
Nátije alda bolatyn negizgi jarystarǵa irikteý kezinde eskeriledi.
